حالیہ بھارتی عمل سے کشمیری عوام کے بنیادی حقوق مزید سلب ہوں گے: پاکستان نے بھارت کوخبردارکردیا

اسلام آباد:حالیہ بھارتی عمل سے کشمیری عوام کے بنیادی حقوق مزید سلب ہوں گے: پاکستان نے بھارت کوخبردارکردیا،اطلاعات کےمطابق پاکستان نے بھارتی وزارت خارجہ کا بیان مسترد کرتے ہوئے کہا ہے کہ حالیہ بھارتی عمل سے کشمیری عوام کے بنیادی حقوق مزید سلب ہوں گے۔

ترجمان دفترخارجہ کے مطابق حالیہ بھارتی عمل سے کشمیری عوام کے بنیادی حقوق مزید سلب ہوں گے، جب دنیا کورونا کا مقابلہ کر رہی ہے تو بھارت نے کشمیریوں کےلیے ڈومیسائل کے قانون میں تبدیلی کردی۔

انہوں نے کہا کہ یہ بی جے پی حکومت کے اخلاقی دیوالیہ پن کی ایک مثال ہے، مقبوضہ کشمیر کے امورکواندرونی قراردینے کی رٹ جھوٹ کو سچ میں تبدیل نہیں کرسکتی، مقبوضہ وادی کو سلامتی کونسل کی قراردادیں متنازعہ علاقہ قراردیتی ہیں۔دفتر خارجہ نے مزید کہا کہ پاکستانی قیادت اور عوام کشمیریوں کی منصفانہ جدوجہد کی حمایت سے کبھی دستبردار نہیں ہوگی۔

ترجمان دفتر خارجہ کے مطابق بھارت کا کوئی بھی عمل مقبوضہ جموں و کشمیر میں ریاستی دہشت گردی کا جواز نہیں ہوسکتا، بی جے پی کی حکومت ہندوتوا نظریات کو مسلط کرنا چاہتی ہے لیکن بھارت کا طاقت کا وحشیانہ استعمال کشمیری عوام کو ان کے مقصد سے نہیں ہٹاسکتا۔

خیال رہے کہ مقبوضہ وادی میں جاری 8 ماہ کے لاک ڈاؤن اور کرفیو کے بعد جب پوری دنیا کی توجہ کورونا وائرس سے نمٹنے پر مرکوز ہے بھارتی حکومت نے ڈومیسائل سے متعلق نیا قانون ‘جموں وکشمیرتنظیم نو آرڈر’ نافذ کردیا ہے۔