ممتاز حیدر
پاکستان مرکزی مسلم لیگ کے صدر خالد مسعود سندھو نے کہا ہے کہ بھارتی جارحیت کے خلاف پاکستان نے بھرپور اور منہ توڑ جواب دے کر ایک عظیم کامیابی حاصل کی ہے۔فتح مبارک ! اپنے آپ کو بہت بڑا چوہدری سمجھنے والے بھارت نے ایک ہی دن میں گھٹنے ٹیک دیئے، امریکی مداخلت کے بعد سیز فائر پراتفاق ہوا جو پاکستان کی کامیاب سفارتی اور عسکری حکمتِ عملی کا منہ بولتا ثبوت ہے۔
خالد مسعود سندھو کا کہنا تھا کہ پاکستانی مسلح افواج نے دشمن کے غرور کو خاک میں ملا دیا ہے اور مودی کا جنگی جنون دریائے راوی میں بہا دیا گیا ہے۔ آج کا دن پاکستان کی فتح کا دن ہے اور اسے یومِ فتح کے طور پر منایا جائے،پاکستانی قوم کو اس کامیابی پر سجدۂ شکر ادا کرنا چاہیے، شکرانے کے نوافل ادا کیے جائیں اور ملک بھر میں مٹھائیاں تقسیم کی جائیں۔ افواجِ پاکستان کے جوانوں کو خراجِ تحسین پیش کرتے ہوئے پھولوں کے گلدستے دیے جائیں اور ان کے حق میں ریلیاں نکالی جائیں۔
خالد مسعود سندھو کا مزید کہنا تھا کہ پاکستان نے ثابت کر دیا ہے کہ وہ نہ صرف اپنی سرزمین کا دفاع کر سکتا ہے بلکہ دشمن کی جارحیت کا بھرپور جواب دینے کی مکمل صلاحیت رکھتا ہے۔ پوری قوم افواجِ پاکستان کے شانہ بشانہ کھڑی ہے اور ہر پاکستانی اس عظیم فتح پر فخر محسوس کرتا ہے،عوام اس موقع پر تحاد و یکجہتی کا مظاہرہ کریں اور اپنی مسلح افواج پر اعتماد رکھیں، کیونکہ یہی طاقتیں پاکستان کی سرحدوں کی محافظ ہیں۔
