سالانہ عرس حضرت نظام الدین اولیا ؒپربھارت کیجانب سے پاکستانی زائرین کوویزے جاری نہ ہو سکے

پاکستان نے بابا گورونانک کے جنم دن کے لئے 3 ہزار بھارتی یاتریوں کو ویزے دیئے ہیں جبکہ بھارت کی طرف سے پاکستانی زائرین کو ویزے جاری نہ ہوسکے۔

باغی ٹی وی : تفصیلات کے مطابق سکھ مذہب کے بانی بابا گورونانک کا 552 واں جنم دن منانے کے لئے بھارت سمیت دنیا بھر سے سکھ یاتری 17 نومبر کو پاکستان پہنچیں گے، پاکستانی ہائی کمیشن نیو دہلی نے 3 ہزار بھارتی سکھ یاتریوں کو ویزے جاری کیے ہیں ہائی کمیشن نے پاکستان میں 17 سے 26 نومبر ویزے جاری کئے ہیں-

ہائی کمیشن کی جانب سے جاری بیان میں کہا گیا کہ سکھ یاتری، پاکستان میں اپنے قیام کے دوران ننکانہ صاحب میں گوردوارا جنم آستھان اور کرتارپور میں گوردوارا دربار صاحب سمیت مختلف گوردوارے جاسکیں گے بھارت کے علاوہ دیگر ممالک میں مقیم ہزاروں سکھ یاتری بھی گرو نانک کے جنم دن کی تقریبات میں شرکت کے لیے پاکستان کا دورہ کریں گے جو مکمل آزادی کے ساتھ پاکستان میں موجود اپنے مقدس مقامات پر جاسکیں گے، انہیں قیام و طعام، سیکیورٹی، میڈیکل اور ٹرانسپورٹ کی سہولت مہیا کی جائے گی، حکومت پاکستان کی طرف سے کسی بھی ملک سے آنے والے یاتری پر کسی قسم کی کوئی پابندی نہیں لگائی جائے گی۔

وفاقی وزیراطلاعات ونشریات فواد چوہدری نے بابا گرونانک کے جنم دن کی تقریبات میں شرکت کےلئےآنے والے سکھ یاتریوں کا خیرمقدم کیا ہےاپنے ٹوئٹ میں کہنا تھا کہ بابا گرونانک کے جنم دن کی تقریبات میں شرکت کے لئے دنیا بھرسے آٹھ ہزارسے زائد سکھ یاتری پاکستان پہنچ رہے ہیں صوفیا،گرواورجوگیوں کی سرزمین پرسکھ یاتریوں کوخوش آمدید کہتے ہیں۔

دوسری طرف برصغیر پاک و ہند کے معروف بزرگ صوفی حضرت نظام الدین اولیا ؒ کے سالانہ عرس کی تقریبات 22 سے 26 نومبرتک بھارتی دارالحکومت نئی دہلی میں شروع ہورہی ہیں، لیکن بھارتی حکومت نے پاکستانی زائرین کو ویزے جاری نہیں کئے، پاک بھارت مذہبی سیاحت کے 1974 کے معاہدے کے تحت بھارتی حکومت پاکستانی زائرین کو ویزے دینے کی پابند ہے، لیکن بھارتی حکومت کافی عرصہ سے پاکستانی زائرین کو ویزے جاری نہیں کررہی ہے۔