fbpx

امریکہ کو پاکستانی برامدات میں رواں سال نمایاں اضافہ ہوا ہے:مسعود خان

واشنگٹن-امریکا میں پاکستانی سفیر مسعود خان نے کہا ہے کہ امریکہ میں پاکستانی برآمدات میں پچھلے سال کے مقابلے میں بڑا اضافہ سامنے آیا ہے ۔ نو ارب ڈالر کی پاکستانی برآمدات میں سالانہ 35 فیصد اضافہ ہوا ہے۔ گذشتہ سال امریکہ کے لئے پاکستانی برآمدات سات ارب ڈالر تھیں لہذا اس سال برآمدات میں گذشتہ سال کے مقابلے میں دو ارب ڈالر کا اضافہ ہوا ہے۔ مالی سال 2021-22 میں امریکہ سے درآمدات تین ارب رہیں جبکہ گذشتہ سال کی درآمدات دو اعشاریہ چار ارب ڈالر تھیں۔

اس طرح اس سال پاکستان اور امریکہ کے مابین کل تجارتی حجم بڑھ کر بارہ ارب ڈالرہوگیا ہے جبکہ گذشتہ سال یہ تقریبا ساڑھے نو ارب ڈالر رہا۔ سفیر پاکستان نے کہا کہ امریکہ کے ساتھ دوطرفہ تجارت میں پاکستان کو بڑی تجارتی کثرت (ٹریڈ سرپلس) حاصل ہے۔ مسعود خان نے کہا کہ امریکہ میں پاکستانی برآمدات میں متاثر کن اضافہ دنیا کے دوسرے ممالک کے ساتھ تجارت کے ضمن میں ایک ٹرینڈ سیٹر ہے۔ انہوں نے کہا کہ امریکہ نے پاکستانی برآمدات کی سب سے بڑی منڈی ہونے کی اولیت برقرار رکھی ہے۔ سفیر پاکستان مسعود خان نے کہا کہ اگر ہماری برآمدات میں 35 فیصد سالانہ کی شرح سے اضافہ جاری رہا تو آئندہ تین سال میں پاکستان امریکہ تجارت کا حجم بیس ارب ڈالر تک پہنچ جائے گا جو کہ دونوں ملکوں کے درمیان موجود تجارت کے بے شمار استعداد (پوٹینشل ) کے اعتبار سے پھر بھی میانہ ہے۔ انہوں نے کہا کہ پاکستانی برآمدات کی امریکی مارکیٹ میں متاثر کن کارگردگی مقامی مارکیٹ اور غیر ملکی سرمایہ کاروں کے اعتماد میں اضافے کا سبب بنے گی۔ اس خاطر خواہ اضافے سے پاکستانی معیشت میں استحکام اور خدشات دور ہوں گے۔ انہوں نے کہا کہ ہمیں اس وقت مارکیٹ کا اعتماد درکار ہے۔

نو ارب ڈالر کی پاکستانی برآمدات میں اشیا کی تجارت چھ اعشاریہ آٹھ ارب ڈالر جبکہ سروسز بشمول آئی ٹی کی برآمدات دو اعشاریہ دو ارب ڈالر رہیں۔ پاکستان سے ایک اعشاریہ چار ارب ڈالر کی آئی ٹی مصنوعات امریکہ برآمد کی گئین۔ جون 2022 میں ہونے والی آئی ٹی ایکسپورٹ ان اعدادوشمار ابھی شامل نہیں کی گئیں۔گذشتہ ایک سال میں پاکستانی ٹیک اسٹارٹ اپس نے آٹھ سو ملین ڈالر کمائے ان میں سے 60 فیصد کو امریکی وینچر کیپیٹل کمپنیوں ،جو کہ زیادہ تر سان فرانسسکو میں واقع ہیں، کی جانب سے فنڈنگ فراہم کی گئی ۔ امریکہ کی سرفہرست مالی کمپنیوں جن میں کلینر پرکنز، ٹائیگر گلوبل اور سویکوا شامل ہیں نے پاکستانی اسٹارٹ اپس کو پری سیڈ، سیڈ اور انکیوبیشن اسٹیج پر معاونت فراہم کرنی شروع کر دی ہے۔ سفیر پاکستان مسعود خان نے کہا کہ گذشتہ چند ماہ میں امریکہ اور پاکستان تجارت اور سرمایہ کاری اور اس کے ساتھ ساتھ صحت ، زراعت اور ٹیک سیکٹر میں دوطرفہ تعاون کے فروغ کے لئے کام کررہے ہیں۔ ہماری توجہ روابط، پیداوار اور ٹھوس نتائج کے حصول پر ہے اور اس کے ثمرات بہت جلد سامنے آئیں گے۔