بھارت میں تیار اور کاسٹ پرمبنی اشتہاروں پر پابندی عائد کردی گئی ، غیرت کا ثبوت دیں ، پیمرا

اسلام آباد : وزیراعظم کے حکم پر پیمرا نے پاکستان میں بھارتی فلموں اور ڈراموں کی نمائش پر پابندی کے بعد اب حکومت نے بھارت میں تیار کیے گئے اور بھارتی کاسٹ پر مبنی اشتہارات کو پاکستانی ٹی وی چینلز پر دکھانے پر پابندی عائد کردی۔

ذرائع کے مطابق اس سے پہلے پاکستان کے مختلف ٹی وی چینلز میں اس وقت کچھ ملٹی نیشنل کمپنیوں کے ایسے اشتہارات چل رہے ہیں جنہیں یا تو بھارت میں تیار کیا گیا یا پھر ان میں دکھائے جانے افراد کا تعلق بھارت سے ہے۔پاکستان کے مختلف ٹی وی چینلز پر چلنے والے ایسے اشتہارات میں زیادہ تر اشتہارات بیوٹی کریم، صابن، سرف، واشنگ پاؤڈر، میک اپ اور موبائلز برانڈز کے ہیں۔

Prohibition of TVCs produced in India / carrying Indian talent pic.twitter.com/IOtZrqzcfi

— Report PEMRA (@reportpemra) August 14, 2019

پیمرا کی جانب سے جاری بیان میں کہا گیا ہے کہ بھارتی کمپنیوں کی جانب سے بنائے گئے اشتہارات یا پھر بھارتی کاسٹ پر مبنی اشتہارات پر فوری پابند عائد کردی گئی۔ بیان میں کہا گیا ہے کہ جہاں حکومت پاکستان ’یوم آزادی‘ کو (اظہار یکجہتی کشمیر) کے طور منا رہی ہے، وہیں بعض ٹی وی چینلز پر بھارت میں بنائے گئے اشتہارات یا پھر بھارتی کاسٹ پر مبنی اشتہارات چل رہے ہیں جو کشمیری بھائیوں کے لیے تکلیف کا باعث ہیں۔ پیمرا کی طرف سے پیغام میں کہا گیا ہے کہ قومی حمیت کا تقاضا یہی ہے کہ بھارت سے بائیکاٹ کرکے اپنی غیرت کا ثبوت دیں

یاد رہے کہ پیمرا نے پاکستان میں بھارتی کاسٹ پر مبنی اشتہارات کو چلائے جانے کو ریاستی پالیسی کے خلاف قرار دیا اور حکم دیا کہ فوری طور پر ایسے اشتہارات کو بند کردیا جائے۔پیمرا نے اپنے نوٹیفکیشن میں 11 ملٹی نیشنل برانڈز کے نام دیتے ہوئے ٹی وی چینلز انتظامیہ پر واضح کیا کہ ان کمپنیوں کے اشتہارات میں بھارتی کاسٹ دکھائی جا رہی ہے اور ان تمام کمپنیوں کے اشتہارات پر فوری پابندی عائد کردی گئی ہے۔