جنگ احد معاملہ :غیر ذمہ دارانہ کلمات نشر کرنے پر پمیرا نے ایکسپریس نیوز کو جوابدہی کا نوٹس بھجوادیا

0
39

اینکر ومیز بان آفتاب اقبال کا اپنے شو میں غزوہ احد میں مال غنیمت کے حوالے سے صحابہ کرام رضی اللہ عنہم اجمعین کا غیر مناسب انداز میں ذکر کیا تھا جس پر انہیں شدید تنقید کا نشانہ بنایا گیا تاہم اب پیمرا نے بھی ایکسپریس نیوز سے جواب طلب کر لیا-

باغی ٹی وی : گزشتہ شب آفتاب اقبال نے نجی ٹی وی چینل ایکسپریس نیوز پر اپنے شو، خبردار، میں غزوہ احد میں مال غنیمت کے حوالے سے صحابہ کرام رضی اللہ عنہم اجمعین کا غیر مناسب انداز میں ذکر کیا تھا جس پر انہیں شدید تنقید کا نشانہ بنایا گیا یہاں تک کہ یہ معاملہ ٹوئٹر پر ٹرینڈ کرنے لگا اور #صحابہ_کا_گستاخ_آفتاب_اقبال صبح سے ٹوئٹر ٹرینڈ فہرست میں پہلے نمبر پر ہے اور لوگ شدید غم و غصے کا اظہار کر رہے ہیں اور حکومت سے آفتاب اقبال کو سزا دینے کا مطالبہ کر رہے ہیں-

تاہم صارفین کے غم و غصے اور مطالبے کو دیکھتے ہوئے پاکستان الیکٹرونک میڈیا ریگولیٹری اتھارٹی (پیمرا) نے بھی ایکسپریس نیوز کو نوٹس جاری کر دیا ہے-


پریس ریلیز کے مطابق پیمرا نے ایکسپریس نیوز کو اس کے پروگرم ، خبردار، جو کہ مورخہ 11 اپریل 2021 کو نشر ہوا میں غیر ذمہ دارانہ کلمات نشر کرنے پر اظہار وجوہ کا نوٹس جاری کرتے ہوئے چینل ہذا کو 7 یوم میں جوابدہی کا حکم دیا ہے –

واضح رہے کہ اس سے قبل سوشل میڈیا پر تنقید کے بعد آفتاب اقبال نے ایک وضاحتی ویڈیو جاری کی اور اپنی گستاخی کی معافی مانگی-


آفتاب اقبال نے کہا کہ ایک بہت ضروری وضاحت اور معذرت کے ساتھ میں حاظر ہوا ہوں خواہش تو یہ ہے کہ پہلے میں وضاحت کروں لیکن میں غیر مشروط معافی اور معذرت سے آغاز کروں گا-

آفتاب اقبال نے اپنی غلطی مانتے ہوئے کہا کہ گزشتہ شب شو خبردار کی قسط میں ہم سے ایک حماقت سرزد ہوئی اور یہ مثال یہاں پر کس طرح ظاہر ہوئی ہے ویسے بنتی نہیں تھی جنگ احد کا حوالہ دے کر میں نے تو بات کہہ دی میں اس پر معذرت خواہ ہوں خدانخواستہ اس پر دور دور تک تصور بھی نہیں کیا جا سکتا کہ صحابہ کی شان میں گستاخی کی جائے یا ایسی طنزیہ کوئی بات کی جائے-

Leave a reply