پشاور، مسجد قاسم علی خان کمیٹی نے کل عید کا اعلان کر دیا، 100 شہادتیں‌ موصول ہوئیں. مفتی شہاب الدین پوپلزئی

پشاور میں مسجد قاسم علی خان کمیٹی نے کل عید الفطر کا اعلان کر دیاہے.

باغی ٹی وی کی رپورٹ‌کے مطابق مفتی شہاب الدین پوپلزئی کی زیرصدارت غیر سرکاری رویت ہلال کمیٹی کا اجلاس ہوا ہے جس میں‌ کل عید کا اعلان کیا گیا ہے. مفتی شہاب الدین پوپلزئی کا کہنا ہے کہ چاند کی رویت کی 100 شہادتیں پشاورسےموصول ہوئیں جس پر کل منگل کو عیدالفطر کا اعلان کیا گیا ہے.

ادھر وفاقی وزیر سائنس و ٹیکنالوجی فواد چوہدری نے واضح طور پر یہ اعلان کیا ہے کہ کل کراچی اور گوادر کی ساحلی پٹی پر چاند نظر آجائے گا اور عیدالفطر بدھ کے روز ہوگی۔ چاند کی رویت کے لیے مرکزی و ریجنل ہلال کمیٹیوں کے اجلاس منگل کو منعقد ہوں گے لیکن اس سے قبل ہی مفتی پوپلزئی نے عید الفطر کا اعلان کردیا ہے۔ یاد رہے کہ پاکستان میں چاند کی رویت کے حوالے سے کئی مسائل درپیش ہیں، خیبر پختونخوا کے دارالحکومت پشاور میں مقامی سطح پر مسجد قاسم خان کے مفتی شہاب الدین پوپلزئی رمضان اور شوال کے چاند کا اعلان کرتے ہیں۔ کئی سالوں سے خیبرپختونخوا میں مرکزی رویت ہلال کمیٹی کے فیصلے کے برخلاف روزے اور عید منائی جاتی ہے، اس سال بھی مفتی شہاب الدین پوپلزئی نے ایک دن قبل ہی روزے کا اعلان کیا تھا. امسال تو خیبر پی کے سے بعض‌ حلقوں کی جانب سے مفتی شہاب الدین پوپلزئی کو مفتی منیب الرحمن کی جگہ رویت ہلال کمیٹی کا چیئرمین بنانے کا مطالبہ بھی کیا گیا ہے.

واضح رہے کہ مفتی شہاب الدین پوپلزئی کی جانب سے کل عید کے اعلان کے بعد پشاور میں ایک دن قبل عید کی روایت امسال بھی برقرار رہی ہے.

جواب چھوڑیں

آپ کا ای میل ایڈریس شائع نہیں کیا جائے گا.