پیر عادل (باغی ٹی وی، نامہ نگار باسط علی گاڈی) تھانہ شاہصدر دین کی حدود میں واقع دربار پیر عادل کے قریب موٹرسائیکل اور پھٹہ رکشہ کے درمیان خوفناک تصادم کے نتیجے میں سکول سے چھٹی کے بعد گھر جانے والا ایک بچہ شدید زخمی ہو گیا۔
تفصیلات کے مطابق حادثہ اُس وقت پیش آیا جب ایک موٹرسائیکل، جو تیز رفتاری کے باعث بے قابو ہو گیا، دربار پیر عادل کے قریب ٹی آراور گاڈر سے لوڈ پھٹہ رکشہ سے جا ٹکرایا۔ ٹکر اتنی شدید تھی کہ موٹرسائیکل سوارطالب علم بچہ بری طرح زخمی ہو گیا۔
حادثے کی اطلاع پر ریسکیو 1122 کی ٹیم فوری طور پر موقع پر پہنچی اور زخمی بچے کو طبی امداد کے لیے علامہ اقبال ٹیچنگ ہسپتال منتقل کر دیا گیا، جہاں ڈاکٹروں کے مطابق بچے کی حالت تشویشناک ہے۔
پولیس نے حادثے کی ابتدائی رپورٹ درج کر لی ہے اور مزید کارروائی جاری ہے۔ مقامی افراد نے سڑک پر ٹریفک کی بدانتظامی اور تیز رفتاری پر تشویش کا اظہار کرتے ہوئے متعلقہ حکام سے فوری اقدامات کا مطالبہ کیا ہے۔
