وزیر اعظم کے نوٹس کے باوجود اشیائے خوردو نوش کے بھاؤ آسمان سے باتیں کرنے لگے

0
36

وزیر اعظم کے نوٹس کے باوجود اشیائے خوردو نوش کے بھاؤ آسمان سے باتیں کرنے لگے

باغی ٹی وی : آٹا، گھی، چینی اور تیل کی قیمتیوں میں اضافے کا سلسلہ بدستور جاری ہے، پشاور میں مکس آٹے کا 20 کلو کا تھیلا 1250 روپے کا ہو گیا، اوپن مارکیٹ میں چینی 100 روپے فی کلوفروخت ہورہی ہے۔

گھی، چینی اور آٹا مہنگا، اشیائے خورونوش کی بڑھتی قیمتوں اور مہنگائی کے طوفان سے عوام پریشان ہو گئے، بنیادی ضرورت کی اشیاء عوام کی پہنچ سے باہر ہو گئیں، یوٹیلٹی سٹورز اور سستا بازاروں سے سستی اشیاء غائب ہو گئیں۔

پشاورکی اوپن مارکیٹ میں مکس آٹے کا 20 کلو کا تھیلا 1100 سے بڑھ کر 1250 روپے کا ہو گیا، سپر آٹے کے 20 کلو تھیلے کی قیمت 1280 سے بڑھ کر 1300 روپے ہوگئی ہے جبکہ 20 کلو فائن آٹا 1350 سے بڑھ کر 1400 روپے کا ہوگیا ہے، شہریوں کا کہنا ہے کہ مہنگائی سے قوت خرید جواب دے گئی ہے۔

یوٹیلٹی سٹورز پر چینی کی قیمت 68 روپے فی کلو ہے جبکہ اوپن مارکیٹ میں چینی 100 روپے فی کلوفروخت ہورہی ہے، یوٹیلٹی سٹور پر سبسڈائزڈ گھی فی کلو 170 روپے میں فروخت ہورہا ہے جبکہ اوپن مارکیٹ میں ایک کلو گھی 250 سے لیکر 280 روپے تک فروخت کیا جا رہا ہے۔

واضح رہے کل ہی وزیراعظم عمران خان کی زیر صدارت پارٹی ترجمانوں کا اجلاس ہوا جس میں پی ڈی ایم تحریک، براڈ شیٹ اور مہنگائی میں کمی لانے پر غور کیا گیا۔ چینی ہنگامی بنیادوں پر درآمد کرنے کا فیصلہ کیا ہے، درآمد کے بعد چینی کی قیمت فوری کم ہوجائے گی۔

وزیراعظم نے کہا کہ چینی اور پاور کے معاملے پر اہم فیصلے کرلیے گئے ہیں، چینی درآمد کرنے کے لیے فوری انتظامات کیے جائیں۔

Leave a reply