ن لیگی رہنماؤں کی درخواست ضمانت پر سماعت، نیب نے کیا کہہ دیا؟

ن لیگی رہنماؤں کی درخواست ضمانت پر سماعت، نیب نے کیا کہہ دیا؟

باغی ٹی وی کی رپورٹ کے مطابق اسلام آباد ہائیکورٹ میں سابق وزیراعظم شاہد خاقان عباسی اور سابق وزیر احسن اقبال کی درخواست ضمانت پر سماعت ہوئی،

چیف جسٹس اطہر من اللہ کی سربراہی میں بینچ نے سماعت کی، دوران سماعت نیب نے استدعا کرتے ہوئے کہا کہ ایک دن کا التوادیاجائے، سپیشل پراسیکیوشن کل دلائل دینگے ،ہم نے التوا کیلئے درخواست بھی دائر کررکھی ہے۔ وکیل احسن اقبال نے کہا کہ ہمیں بھی پتہ چل جاتا توہم چاردن تیاری نہ کرتے ،

چیف جسٹس اطہر من اللہ نے کہا کہ آپ آج دلائل دینا چاہتے ہیں تو دیدیں نیب کل دیدے گا ،چیف جسٹس ہائیکورٹ نے کہا کہ واضح کرچکے ہیں کہ وارنٹ گرفتاری کن حالات میں جاری ہو سکتے ہیں ،عدالت نے شاہد خاقان عباسی اور احسن اقبال کی درخواست ضمانت پر سماعت کل تک ملتوی کردی ،عدالت نے شاہد خاقان عباسی ، احسن اقبال اور نیب سے کل دلائل طلب کرلئے.

ایل این جی کیس میں سابق وزیراعظم شاہد خاقان عباسی نے ضمانت کیلئے رجوع کیا تھا،شاہد خاقان عباسی نے ضمانت کیلئے اسلام آباد ہائیکورٹ میں درخواست دائر کردی،

درخواست میں استدعا کی گئی ہے کہ ریفرنس کا ٹرائل مکمل ہونے تک ضمانت پر رہا کیا جائے،نیب میرے خلاف کوئی بھی کیس بنانے میں ناکام رہا،میں نے کوئی جرم نہیں کیا نہ ہی میں نے کسی کی معاونت کی، نیب کی جانب سے عدالت میں محض ایک عبوری ریفرنس دائر کیاگیا،نیب قانون اورنہ کسی اورقانون کے تحت مجھ پر کوئی کیس بنتا ہے ۔

واضح رہے کہ چند روز قبل شاہد خاقان عباسی نے کہا تھا کہ میں ضمانت نہین کرواؤں گا ، نیب میرے خلاف جرم ثابت کرے، انہوں نے نیب آرڈیننس سے بھی فائدہ لینے کی مخالفت کی تھی تا ہم شاہد خاقان عباسی نے اپنے بیان سے یوٹرن لیتے ہوئے درخواست ضمانت دائر کر دی

واضح رہے کہ حالیہ دنوں میں عدالتیں اپوزیشن رہنماؤں آصف زرداری، فریال تالپور، مفتاح اسماعیل، نواز شریف، مریم نواز، رانا ثناء اللہ کو ضمانت پر رہا کر چکی ہیں، خورشید شاہ کی بھی عدالت نے ضمانت کی تھی تا ہم بعد ازاں ہائیکورٹ نے ضمانت کا حکم نامہ معطل کر دیا.