کراچی: کراچی کے پوش ایریاز سے لگژری گاڑیاں چھیننے والے گینگ کے سرغنہ پولیس کانسٹیبل کو گرفتار کر لیا گیا ہے۔ پولیس کے مطابق ملزم نے اعتراف کیا ہے کہ اس نے کراچی کے مختلف پوش علاقوں سے دو درجن سے زائد گاڑیاں چھیننے کی وارداتیں کی ہیں۔
پولیس کا کہنا ہے کہ یہ چوری شدہ گاڑیاں گینگ کے دیگر ارکان کے ذریعے بلوچستان میں فروخت کی جاتی تھیں۔ پولیس نے ملزم سے چھینی گئی گاڑیاں، سرکاری اسلحہ اور منشیات برآمد کرنے کا دعویٰ کیا ہے۔ملزم کی شناخت پولیس کانسٹیبل رانا کاشف کے طور پر ہوئی ہے جو کہ فارن سکیورٹی سیل میں ڈیوٹی پر تعینات تھا۔ ملزم نے گزشتہ سال فیروز آباد سے اسلحہ کے زور پر چھینی جانے والی گاڑی کا بھی اعتراف کیا ہے۔ مزید برآں، ملزم نے دو درجن سے زائد دیگر وارداتوں میں بھی ملوث ہونے کا اعتراف کیا ہے۔
پولیس کے مطابق ملزم کے دیگر ساتھیوں کو گرفتار کرنے اور مزید گاڑیوں کی برآمدگی کے لیے چھاپے مارے جا رہے ہیں۔
