تلہ گنگ: نئے تعینات ہونے والے ڈپٹی کمشنر سے پریس کلب کے وفد کی ملاقات

تلہ گنگ،باغی ٹی وی (شوکت ملک سے) نوتعینات ڈپٹی کمشنر ضلع تلہ گنگ مصور احمد خان نیازی سے پریس کلب کے وفد کی ملاقات، نومولود ضلع تلہ گنگ کے انتظامی معاملات پر تفصیلاً بات چیت، تفصیلات کے مطابق ڈپٹی کمشنر ضلع تلہ گنگ مصور احمد خان نیازی سے ڈسٹرکٹ پریس کلب تلہ گنگ کے صحافتی وفد نے ان کے آفس میں ملاقات کی، صحافیوں سے بات چیت کرتے ہوئے ڈپٹی کمشنر مصور احمد خان نیازی کا کہنا تھا کہ ضلع تلہ گنگ رقبہ کے لحاظ سے کئی اضلاع سے بڑا ضلع ہے۔ مستقبل قریب میں یہاں بڑے میگا ترقیاتی کام شروع ہونے جا رہے ہیں۔ سب سے پہلے انتظامی افسران اور محکموں کے لئے انفراسٹرکچر کےلئے کاوشیں کی جا رہی ہیں۔ انڈسٹریل زون، میڈیکل کالج سمیت اہم ترین منصوبوں کےلئے ہوم ورک جاری ہے۔ چالیس کے لگ بھگ محکموں کے انفراسٹرکچر اور دفاتر کے استعمال کےلئے ضروری سامان خریداری کےلئے آئندہ چند روز میں باقاعدہ ٹینڈرز جاری کر دیئے جائیں گے۔ ڈپٹی کمشنر نے بتایا کہ ضلع تلہ گنگ ڈائری تیار کی جا رہی ہے۔ جس میں ضلع تلہ گنگ کے اہم اور تاریخی مقامات، سیاحتی مقامات، اہم شخصیات، تاریخی پس منظر سمیت ہر شعبہ ہائے زندگی سے تعلق رکھنے والی نمایاں اور منفرد تصاویر، تحریریں وغیرہ اس میں شامل ہوں گی۔ جس سے ضلع تلہ گنگ کی پہچان اور تعارف ہرسو پہنچے گا۔