وزیراعظم کا ایف اے ٹی ایف میں حمایت پر اماراتی ولی عہد سے اظہار تشکر

اسلام آباد : عرب امارت اور پاکستان کے درمیان تعلقات مضبوط سے مضبوط تر ہونےلگے ،وزیراعظم عمران خان نے متحدہ عرب امارات (یو اے ای) کے ولی عہد محمد بن زید النیہان سے 700 پاکستانی قیدیوں کی رہائی اور ایف اے ٹی ایف میں پاکستان کی حمایت پر شکریہ ادا کیا۔

رپورٹ کے مطابق وزیراعظم عمران خان نے ابوظہبی کے ولی عہد کو ٹیلیفون کیا جس میں دونوں رہنماؤں نے دو طرفہ تعلقات اور علاقائی صورتحال پر تبادلہ خیال کیا۔ وزیراعظم عمران خان نے کہا کہ دونوں ممالک کے درمیان تعاون انتہائی اہمیت کا حامل ہے، پاکستان، متحدہ عرب امارات کے ساتھ مستحکم تعلقات کو اہمیت دیتا ہے۔

یاد رہے کہ اس سے پہلے شیخ محمد بن زید اور وزیراعظم عمران خان نے دو طرفہ تعلقات کے تمام پہلووں پر تبادلہ خیال کیا تھا اور دونوں رہنماؤں نے تاریخی تعلقات کو مزید مستحکم کرنے کے عزم کا بھی اظہار کیا تھا۔