ڈکیتی کے دوران مزاحمت پر نوجوان کے قتل کا مرکزی ملزم پولیس مقابلے میں ہلاک

ملزمان کی گرفتاری کیلئے ایس ایس پی سینٹرل کی سربراہی میں ٹیمیں بنائی گئی تھیں
0
116

کراچی: نیو کراچی کے علاقے بلال کالونی میں ڈکیتی کے دوران مزاحمت پر نوجوان کے قتل کا مرکزی ملزم پولیس مقابلے میں ہلاک ہوگیا۔

باغی ٹی وی : ڈی آئی جی ویسٹ زون عرفان علی بلوچ نے پریس کانفرنس میں بتایا کہ 24 مارچ کو نیوکراچی بلال کالونی میں فوم کی دکان پر لوٹ مار کے دوران مزاحمت کرنے پر ملزمان نے نوجوان عبدالرحمان کو قتل کردیا تھا ملزمان کی گرفتاری کیلئے ایس ایس پی سینٹرل کی سربراہی میں ٹیمیں بنائی گئی تھیں اور آج صبح نیو کراچی سیکٹر فائیو ایچ میں پولیس مقابلے میں ملزم افضل حسین ہلاک ہوا جبکہ اس کے ساتھی کو زخمی حالت میں پولیس نے گرفتار کیا۔

انہوں نے بتایا پولیس مقابلے میں زخمی ملزم نے دوران تفتیش انکشاف کیا کہ ہلاک ملزم ہی عبدالرحمان کے قتل میں ملوث تھا اور ان ملزمان نے ہی فوم کی دکان پر لوٹ مار کی تھی، نوجوان عبدالرحمان نے ملزمان پکڑنے کی کوشش کی، مزاحمت پر ملزمان نے فائر نگ کی جس سے عبدالرحمان جاں بحق ہوا پولیس حکام اس دن سے ہی اس کیس پر ٹیکینکل طریقے سے مستقل کام کررہے تھے اور اب پولیس کو اس کیس میں کامیابی ملی ہے۔

ڈی آئی جی عرفان بلوچ نے بتایا کہ ڈسٹرکٹ ویسٹ میں بھی اسٹریٹ کرائم میں ملوث ایک گینگ برسٹ کیا گیا ہے اور اس کارروائی میں 8 ملزمان پر مشتمل گینگ پکڑا گیا ہے، انہوں نے کہا اس گینگ کے پاس ہتھیار کہاں سے آرہے ہیں اس سلسلے میں بھی ہم کام کر رہے ہیں۔

Leave a reply