کوئٹہ میں زوردار دھماکہ، 5 افراد جاں بحق، 36 سے زائد زخمی

بلوچستان کے شہر کوئٹہ میں دھماکہ سے 5 افراد جاں بحق اور 30 سے زائد زخمی ہو گئے ہیں، زخمیوں میں 2 پولیس اہلکار، خواتین اور بچے بھی شامل ہیں، یہ دھماکہ پولیس وین کے قریب ہوا ہے،

باغی ٹی وی کی رپورٹ کے مطابق دھماکہ اس قدر زوردار تھا کہ اس کی آواز دور دور تک سنی گئی، دھماکہ میں زخمی ہونے والے چالیس کے قریب افراد کو ہسپتال منتقل کیا گیا ہے جن میں‌ سے متعدد افراد کی حالت تشویشناک بتائی جاتی ہے،

رپورٹ کے مطابق یہ دھماکہ میزان چوک کے قریب سٹی تھانہ کے سامنے ہوا ہے، ابتدائی طور پر دھماکے کی نوعیت یا شدت کا پتہ نہیں چل سکا ہے، سکیورٹی فورسز اور ریسکیو ٹیمیں جائے دھماکہ کی طرف روانہ ہوگئی ہیں، دھماکے کے باعث علاقے میں خوف و ہراس پھیل گیا ہے، واضح رہے کہ حالیہ دنوں‌ میں ملک کے اندر تخریب کاری کی وارداتوں‌ میں شدت پیدا کرنے کی کوششیں کی جارہی ہیں،

ریسکیوذرائع کے مطابق دھماکہ خیز مواد موٹرسائیکل میں نصب تھا جس کے ذریعے پولیس کی گاڑی کو نشانہ بنانے کی کوشش کی گئی، دھماکہ اس وقت ہوا جب علاقہ میں رش تھا اور لوگ عید کی خریداری میں مصروف تھے۔

ریسکیوذرائع نے مزید بتایا کہ دھماکے کے فوری بعد سیکیورٹی اہلکاروں نے علاقے کو گھیرے میں لے لیا جبکہ کوئٹہ کے سول اسپتال سمیت دیگر سرکاری اسپتالوں میں بھی ایمرجنسی نافذ کرتے ہوئے ڈاکٹرز اور پیرا میڈیکل اسٹاف کو فوری طلب کر لیا گیا تھا۔

جواب چھوڑیں

آپ کا ای میل ایڈریس شائع نہیں کیا جائے گا.