رمضان شوگرملزکیس ، حمزہ شہباز کے جوڈیشل ریمانڈ میں 9 اگست تک توسیع

رمضان شوگرملزکیس ، حمزہ شہباز کے جوڈیشل ریمانڈ میں 9 اگست تک توسیع

لاہور ۔ یکم اگست(اے پی پی ) احتساب عدالت لاہور نے رمضان شوگرملزکیس میں پنجاب اسمبلی میں اپوزیشن لیڈر و مسلم لیگ ن کے رہنما حمزہ شہباز کے جوڈیشل ریمانڈ میں 9 اگست تک توسیع کردی ہے،احتساب عدالت کے جج وسیم اختر نے کیس کی سماعت کی، عدالتی سماعت کے موقع پر حمزہ شہباز کو سخت سکیورٹی میں عدالت کے رو برو پیش کیا گیا جبکہ مسلم لیگ ن کے صدر و قومی اسمبلی میں اپوزیشن لیڈر شہباز شریف سینیٹ انتخابات کی وجہ سے عدالت میں پیش نہ ہوئے، عدالت نے شہباز شریف کی حاضری سے معافی کی درخواست منظور کرلی، دوران سماعت حمزہ شہباز نے عدالت میں بیان دیتے ہوئے کہا کہ میں عام شہری ہوں لیکن نیب کے نزدیک میں بڑا گنہگار ہوں مجھ پرلگائے گئے کرپشن کے الزامات بے بنیاد ہیں ‘انہوں نے کہا کہ میں نے کیا جرم کیا ہے،یہ سوال چھوڑ کے جا رہا ہوں ،قیامت تک یہ میرے سوال کا جواب نہیں دے سکیں گے، عدالت نے حمزہ شہباز کے جوڈیشل ریمانڈ میں 9 اگست تک توسیع کردی،یاد رہے کہ رمضان شوگرملزریفرنس میں شہباز شریف اور حمزہ شہباز کو نامزد کیا گیا ہے، نیب ریفرنس میں کہا گیا تھا کہ ملزمان نے رمضان شوگرملزکےلئے10کلومیٹرطویل نالہ بنوایا، شہبازشریف نے بطور وزیراعلیٰ پنجاب اختیارات کا ناجائزاستعمال کیا اور اپنے خاندان کی ملز کو فائدہ پہنچانے کےلئے عوامی مفاد کا نام لیا، ریفرنس کے مطابق شہباز شریف کے اس فیصلے سے سرکاری خزانے کو 213 ملین کا نقصان ہوا، سرکاری خزانے کا نقصان شہباز شریف اور حمزہ شہباز کی ملی بھگت سے ہوا، اتنے شواہد موجود ہیں کہ ریفرنس دائر کیا تاکہ کیس چلایا جا سکے،نیب ریفرنس میں کہا گیا حمزہ شہباز کے خلاف انکوائری جاری ہے، مکمل ہونے پر ضمنی ریفرنس دائر کیا جائے گا، شہباز شریف اور حمزہ شہباز کے خلاف ٹرائل جلد مکمل کر کے قانون کے مطابق سزا دی جائے;46; ۔