راولپنڈی (نامہ نگار)ناجائز تجاوزات کے خلاف آپریشن جاری رہے گا، اے سی سٹی ملک حاکم خان
باغی ٹی وی کے نامہ نگار شوکت علی ملک اور سینئر صحافی محسن قیوم شیخ نے اسسٹنٹ کمشنر سٹی ملک حاکم خان سے ان کے دفتر میں ملاقات کی۔ ملاقات کے دوران راولپنڈی شہر میں جاری ناجائز تجاوزات کے خلاف آپریشن سمیت دیگر مسائل پر تفصیلی تبادلہ خیال کیا گیا۔
نامہ نگار اور سینئر صحافی نے ناجائز تجاوزات کے خاتمے کے لیے اے سی سٹی کی کوششوں کو سراہا اور عوامی مفاد میں ان کی کاروائیوں کو مثبت قدم قرار دیا۔
اس موقع پر اسسٹنٹ کمشنر ملک حاکم خان نے گفتگو کرتے ہوئے کہا کہ ہمارا مقصد تاجروں کے کاروبار کو آسان اور عوام کو سہولتیں فراہم کرنا ہے۔ ناجائز تجاوزات کے خلاف آپریشن ناگزیر ہے تاکہ شہر کو عوام کے لیے زیادہ قابل رہائش بنایا جا سکے۔ انہوں نے مزید کہا کہ تجاوزات کے مکمل خاتمے تک یہ آپریشن بلا تفریق اور بھرپور انداز میں جاری رہے گا۔
شہریوں نے بھی ان اقدامات کی حمایت کی اور تجاوزات کے خاتمے کے لیے انتظامیہ کے عزم کو سراہا۔
