راولپنڈی ٹریفک پولیس نے یوم عاشور کے لیے ٹریفک پلان جاری کر دیا

باغی ٹی وی کی رپورٹ کے مطابق راولپنڈی ٹریفک پولیس نے یوم عاشور کے لیے ٹریفک پلان جاری کر دیا

ٹریفک پولیس راولپنڈی نے یو م عاشور کے موقعہ پر ماتمی جلوسوں کو ٹریفک کے حوالے سے مکمل اورفول پروف سکیورٹی فراہم کرنے کے لیے ٹریفک پلان جاری کر دیا۔نویں اور دسویں محرم کو ٹریفک کے بہترین انتظامات کو مد نظر رکھتے ہوئے ٹریفک پولیس کے 9ڈی ایس پیز،41انسپکٹرز،604ٹریفک وارڈنز اور 133ٹریفک اسسٹنٹس خصوصی ڈیوٹی کے فرائض سر انجام دیں گے۔

دسویں محرم الحرام کو کمیٹی چوک سے اقبال روڈ کی طرف ہر قسم کی ٹریفک کا داخلہ بند ہو گا۔DAVکالج چوک سے ٹریفک ڈائیورشن لگائی جائے گی جہاں سے کالج روڈ کی طرف ہر قسم کی ٹریفک کا داخلہ بند ہو گا۔جبکہ ماتمی جلوس کے نیا محلہ پہنچنے پر DAVکالج چوک سے فوارہ چوک کی طرف کسی قسم کی ٹریفک کو نہیں جانے دیا جائے گا۔

اس موقع پر ڈیوٹی آفیسر ہیڈ کواٹر محمد وسیم نے ٹریفک پلان جاری کرتے ہوئے کہا کہ یوم عاشور کے موقع پر ماتمی جلوسوں کو ٹریفک کے حوالے سے مکمل اور فول پروف سکیورٹی فراہم کی جائے گی اس سلسلے میں پبلک سروس ٹرانسپورٹ کو DAvکالج چوک سے واپس بھجوا دیا جائے گا جبکہ دیگر ٹریفک کو گوالمنڈی سے ڈھوک کمہار سے بھوسہ گودام کی طرف موڑا جائے گا۔ ڈیوٹی آفیسر ہیڈ کواٹر نے بتایا کہ مشرق ہوٹل، سٹی صدر روڈ پر ڈائیورشن لگا کر واپس صدر اور موہن پورہ کی طرف موڑا جائے گا۔جہاں سے ٹریفک سینما چوک سے جا کر براستہ گنجمنڈی روڈ سے پیر ودھائی کی طرف جائے گی۔

اسی طرح سینما چوک سے کشمیری بازار ٹریفک کو نہیں جانے دیا جائے گااور تمام ٹریفک براستہ ٹرانزنٹ کیمپ صدر کی طرف جائے گی۔تھانہ سٹی کے قریب بھی ڈائیورشن لگا کر آنے والی ٹریفک کو گنجمنڈی روڈ کی طرف موڑا جائے گا جو کہ براستہ ڈھوک حسو پرودھائی کی طرف جائے گی۔شاہ اللہ دتہ روڈ پر بھی ڈائیورشن ہو گی جہاں سے ٹریفک کو ڈھوک دلال،TBہسپتال،پیر ودھائی اور اصغر مال کی طرف بھیجا جائے گا۔بیکری چوک کے پاس ڈائیورشن لگا کر بنی چوک اور لنک روڈ کی طرف بھجوایا جائے گا جو کہ براستہ سید پور روڈ، سرکلر روڈ سے ہوتی ہوئی مری روڈسے لیاقت باغ کی طرف آئیگی۔ہملٹن چوک اور بانسوالا چوک پر ڈائیورشن لگا کرڈنگی کھوئی اور جامع مسجد پر ٹریفک کو نہیں آنے دیا جاے گا.

اسکے علاوہ پیر چوہا چوک پر ڈائیورشن لگا کرقدیمی امام بارگاہ بلتستانیہ کی طرف آنے والی ٹریفک کو مکمل بند کیا جائے گا۔ڈیوٹی آفیسر محمد وسیم کا مزید کہنا تھا کہ سیٹلائیٹ ٹاﺅن سے برآمد ہونے والے جلوس کے موقع پر امام بارگاہ یادگار حسینی کے دونوں اطراف تھانہ نیوٹاﺅن،پنجاب کالج آف کامرس،حیات ولی ہسپتال،عزیز نرسنگ ہوم،بنی چوک جانب کوہاٹی بازار،روشن بیکری، کالی ٹینکی چوک، اصغر مال کالج، بنی مارکیٹ اور دیگر مختلف مقامات پر ٹریفک و متبادل راستوں پر ڈائیورٹ کیا جائے گا۔

اس مو قع پر چیف ٹریفک آفیسر راولپنڈی سید علی اکبر نے ٹریفک پولیس کو ہدایات جاری کیں کہ الرٹ رہ کر اپنی ڈیوٹی کو سر انجا دیتے ہوئے سکیورٹی کو یقینی بنانا ہے اور ٹریفک کو متبادل روٹ پر رواں دواں رکھتے ہوئے ٹریفک پلان پر مکمل عملد رآمد کروانا ہے۔