ڈاکٹرغلام مصطفی بڈانی
اوکاڑہ ،باغی ٹی وی(نامہ نگار ملک ظفر) وزیراعلیٰ پنجاب کی خصوصی صفائی مہم کے تحت ضلع کونسل اوکاڑہ میں ساہیوال واٹر اینڈ سینی ٹیشن سروسز کمپنی (SWSSC) کی افتتاحی تقریب منعقد ہوئی، جس کی صدارت ایم این اے چوہدری ریاض الحق جج اور کمشنر ساہیوال شعیب اقبال سید نے کی۔ تقریب میں ڈپٹی کمشنر احمد عثمان جاوید، ایڈیشنل ڈپٹی کمشنرز حافظ محمد عمر طیب اور چوہدری عبدالجبار گجر، اسسٹنٹ کمشنر احسن ممتاز، پروجیکٹ مینیجر رانا ساجد، ڈپٹی ڈائریکٹر لوکل گورنمنٹ عاصم وٹو، سول ڈیفنس آفیسر وقار اکبر، صدر بار ایسوسی ایشن محمد اصغر خان، صدر انجمن تاجران شیخ ریاض انور، دیگر افسران، میڈیا، سول سوسائٹی، شہری، اور صفائی عملہ شریک ہوا۔
پروجیکٹ مینیجر نے صفائی اور سالڈ ویسٹ مینجمنٹ پلان پر تفصیلی بریفنگ دی۔ چوہدری ریاض الحق جج نے کہا کہ وزیراعلیٰ مریم نواز شریف کی "ستھرا پنجاب” مہم صحت مند پنجاب کی عکاس ہے۔ انہوں نے بتایا کہ پنجاب کی تاریخ میں پہلی بار صاف ماحول کے لیے ریکارڈ فنڈز مختص کیے گئے ہیں، اور عوام کو خوشگوار ماحول دینے کے لیے تمام اقدامات کیے جائیں گے۔
کمشنر شعیب اقبال سید نے کہا کہ صاف ماحول صحت مند زندگی کی ضمانت ہے، لیکن اس کے لیے عوامی تعاون ناگزیر ہے۔ ڈپٹی کمشنر احمد عثمان جاوید نے بتایا کہ اوکاڑہ پنجاب کا پہلا ضلع ہے جہاں جدید مشینری سے 20 یونین کونسلز کو زیرو ویسٹ بنایا گیا۔ اب پرائیویٹ کمپنی کے ذریعے ضلع بھر کے شہری و دیہی علاقوں میں صفائی اور ویسٹ مینجمنٹ کے امور سرانجام دیے جائیں گے، اور پورے ضلع کو زیرو ویسٹ بنانے کے لیے تمام سٹیک ہولڈرز کی حمایت درکار ہے۔
بعدازاں، ایم این اے، کمشنر، اور ڈپٹی کمشنر نے SWSSC کی مشینری و گاڑیوں کا معائنہ کیا اور شجرکاری مہم کے تحت ضلع کونسل کے لان میں پودے لگائے۔
