سلمان خان بگ باس شو سیزن 14 کی میزبانی کیوں کر رہے ہیں؟

بالی وڈ سلطان سلمان خان نے بھارت کے مشہور ریئلٹی شو ’بگ باس سیزن 14‘ کی میزبانی کرنے کی وجہ بتا دی۔

باغی ٹی وی : بھارت بھر میں سب سے زیادہ دیکھے جانے والا متنازع شو’ بگ باس‘ کے اب سیزن 14 کی تیاریاں عروج پر ہیں اس حوالے سے کچھ روز بعد گرینڈ پریمیئر بھی ہونے جا رہا ہے تاہم تقریب سے قبل سلمان خان کی شو کی انتظامیہ سمیت پریس کانفرنس کی گئی جس میں دبنگ اداکار نے دوسروں کے لئے ہمدردی کا اظہار کرتے ہوئے سماں باندھ دیا۔

انڈیا ٹوڈے کی رپورٹ کے مطابق پریس کانفرنس کے دوران سلمان خان نے بگ باس 14 کرنے کی وجہ بتاتےہوئے کہا کہ میں یہ سیزن اس وجہ سے کر رہا ہوں کیوں کہ اس سے بہت سے لوگوں کا روزگار پیدا ہوتا ہے تاہم اس دوران اداکار نے شو کے پروڈیوسر سے کام کرنے والوں سے متعلق سوال کیا کہ یہاں لوگ کورونا کی وجہ سے ایک ساتھ کام نہیں کر سکتے اور اب شفٹوں میں کام کر رہے ہیں تو کیا انہیں تنخواہ پوری ادا کی جارہی ہے یا آدھی ؟۔
https://www.instagram.com/p/CFg-eCbAHju/?igshid=1ur8d765pgwwq
سلمان خان کے سوال پر شو کے پروڈیوسر نے جواب دیتے ہوئے کہا کہ کورونا کے باعث حفاظتی تدابیر کو مد نظر رکھتے ہوئے مخصوص لوگوں کے ساتھ شفٹوں میں کام کیا جارہا ہے تاکہ کوئی انگلی نہ اٹھا سکے اور اس طرح سب کی نوکری بھی محفوظ ہے اور جہاں تک تنخواہ کی بات ہے تو یہاں کام کرنے والوں کا وقت کم کئے جانے کے باوجود پوری تنخواہ دی جارہی ہے۔

دبنگ اداکار نے تنخواہ کے سوال پر جواب دیتے ہوئے کہا کہ مجھے خوشی ہوگی کہ شو کے سیٹ پر دیگر کام کرنے والے افراد کو معاوضہ اداکرنے کے لئے میرا معاوضہ کم کردیا جائے۔