fbpx

فلم کی شوٹنگ کے دوران سلمان خان کے ڈانس کی ویڈیو سوشل میڈٰیا پر وائرل

استبنول: بالی ووڈ کے سلطان سلمان خان کی ترکی میں اپنی نئی فلم کی شوٹنگ کے دوران ڈانس کرنے کی ویڈیو وائرل ہوگئی۔

باغی ٹی وی : بالی ووڈ سلطان سلمان خان ان دنوں اداکارہ کترینہ کیف کے ساتھ ترکی میں موجود ہیں جہاں وہ یش راج فلمز کے بینر تلے بننے والی اپنی بلاک بسٹر فلم ’ٹائیگر‘ کے سیکوئل کی شوٹنگ میں مصروف ہیں۔ ترکی میں ابتدائی شوٹنگ مکمل کرنے کے بعد وہ روس میں فلم کی باقی شوٹنگ مکمل کریں گے۔

ترکی میں ’ٹائیگر تھری‘ کے ایک گانے کی شوٹنگ مکمل ہونے کے بعد مداحوں کی جانب سے سلمان خان کے ساتھ ان کے مشہور گانے ’جینے کے ہیں چار دن’پر ڈانس کرنے کی فرمائش کی گئی جس پربالی ووڈ ٹائیگر نے مداحوں کے ساتھ ڈانس کیا وہاں موجود کسی شخص نے ڈانس کی ویڈیو بناکر سوشل میڈیا پر اپ لوڈ کردی جو وائرل ہوگئی۔

ایک مداح نے سلمان خان کے ڈانس پر رد عمل دیتے ہوئے کہا کہ سلومیاں آج بھی اسی توانائی سے ڈانس کررہے ہیں جیسے فلم ’مجھ سے شادی کرو گی‘ میں کیا تھا۔

واضح رہے کہ ممبئی سے فلم ’ٹائیگر تھری‘ کی شوٹنگ کے لیے روانہ ہوتے وقت سلمان خان کو ایئرپورٹ پر سیکیورٹی آفیسر نے روک لیا تھا جس کی ویڈیو سوشل میڈیا پر وائرل ہوگئی تھی اور بعد ازاں پولیس فورس اور مداحوں کی جانب سے اہلکار کی تعریف کی گئی تھی۔

سلمان خان اپنی ٹائیگر فرنچائز کی تیسری فلم کی شوٹنگ کے لیے روس جانے کی غرض سے جیسے ہی ممبئی ایئرپورٹ پہنچے جہاں مداحوں اور صحافیوں کی بڑی تعداد نے انہیں گھیر لیا اور ان سے تصویر کی فرمائش کرنے لگے۔ جب ہجوم زیادہ بڑھ گیا اور لوگوں کی تعداد میں اضافہ ہو گیا توایئرپورٹ پر موجود سینٹرل انڈسٹریل سیکیورٹی فورس (سی آئی ایس ایف) کے اہلکار اے ایس آئی سومناتھ موہانتے نے سلومیاں کو سیکیورٹی چیک کے لیے ایئرپورٹ پر روک لیا تھا-

سلمان خان کو ائیر پورٹ پر روکنے والا پولیس اہلکار مشکل میں پھنس گیا

سلمان خان کو ایئر پورٹ پر روکنے والے اہلکار کی ویڈیو سوشل میڈیا پر وائرل ہوگئی تھی اور لوگ اپنے فرض کی ادائیگی پر سیکیورٹی اہلکار کی تعریفیں کررہے تھے جب کہ کچھ لوگ تو انہیں ہیرو قرار دے رہے تھے، لیکن بعد یہ اہلکار مشکل میں پڑگیا تھا-

بھارتی میڈیا رپورٹس کے مطابق سی آئی ایس ایف نے اے ایس آئی سومناتھ موہانتے کا موبائل فون قبضے میں لے لیاتھا کیونکہ اس نے سلومیاں کو ایئرپورٹ پر روکنے کے بعد ایک میڈیا تنظیم سے فون پر بات کی تھی۔

رپورٹس کے مطابق موہانتے کا موبائل فون ضبط کرلیا گیا تھا کیونکہ اس نے میڈیا سے بات چیت کی اور یہ پروٹوکول کی خلاف ورزی ہے۔ میڈیارپورٹس میں مزید کہا جارہا تھا کہ اے ایس آئی موہانتے کا موبائل فون اس لیے ضبط کیا گیا ہے تاکہ اس بات کو یقینی بنایا جاسکے کہ وہ اس واقعے کے بارے میں میڈیا سے مزید بات چیت نہ کرسکے-