نائیک محمد آصف نواز شہید کی بیوہ ثمرین کوثر نے اپنے شوہر کی شہادت کو اپنی طاقت، حوصلہ اور جینے کا مقصد بنا لیا ہے۔ ان کی کہانی ایک ایسی مثال ہے جس میں صبر، عزم، اور حب الوطنی کی بے مثال قربانیوں کا رنگ نمایاں ہے۔
نائیک محمد آصف نواز شہید، جو پنجاب رجمنٹ کے دلیر سپاہی تھے، نے 22 نومبر 2017 کو سیاچن کے محاذ پر دفاع وطن میں اپنی جان دی۔ سیاچن جانے سے قبل وہ دہشت گردوں کے خلاف کامیاب آپریشنز میں حصہ لے چکے تھے، جن میں انہوں نے تین دہشت گردوں کو ہلاک کیا تھا۔ ان کی بہادری اور قربانی وطن کے دفاع کے لیے ایک لازوال مثال ہیں۔
شہید نائیک آصف نواز کی بیوی ثمرین کوثر نے اپنے شوہر کی شہادت کے بعد ایک نیا عزم اور حوصلہ پیدا کیا۔ انہوں نے اپنی زندگی کا مقصد اپنی قوم کی خدمت اور وطن کی حفاظت کو بنایا۔ ثمرین کوثر نے اپنے شوہر کے نقش قدم پر چلتے ہوئے ایئرپورٹ سیکورٹی فورس (اے ایس ایف) کو جوائن کیا اور اپنے آپ کو اس مقصد کے لیے وقف کر دیا کہ وہ وطن کی حفاظت میں اپنا حصہ ڈالیں۔
ثمرین کوثر کا کہنا تھا: "میرے شوہر کی شہادت نے مجھے مزید مضبوط اور پرعزم بنایا ہے۔ میں نے اپنے شوہر کے نقش قدم پر چلنے کا فیصلہ کیا تاکہ ان کی قربانی کو ہمیشہ زندہ رکھ سکوں۔ وردی پہن کر اپنے وطن کی خدمت کرنا میرا فرض ہے اور یہی میرا عزم ہے۔” ثمرین کوثر کا مزید کہنا تھا کہ شوہر کی شہادت کے بعد میرا جذبہ بلند ہوا، ملک کی حفاظت ہم نہیں کریں گے تو کون کرے گا، جس دن ڈیوٹی پر مامور ہوں گی اس دن خاوند کا جذبہ میرے سامنے ہو گا، میرے جذبے کو دیکھتے ہوئے پاک فوج نے میرا بہت ساتھ دیا، تہہ دل سے پاک فوج کی شکر گزار ہوں پریڈ کی تیاری اس جذبے کے ساتھ کرنا چاہتی ہوں کہ ملک کے لئے کچھ خاص کرنا چاہتی ہوں، میرے بچے بھی والد کی قربانی اور والدہ کے عزم کو دیکھتے ہوئے وطن کے لئے حاضر ہوں گے، مجھے اس بات پر فخر ہے کہ پاسنگ آؤٹ پریڈ میں دونوں بچے، والدین شامل ہوں گے.
پاک فوج نے ثمرین کوثر کے جذبے کو سراہا اور انہیں اے ایس ایف میں شامل ہونے کا موقع فراہم کیا۔ آج وہ اے ایس ایف اکیڈمی کراچی میں تربیت حاصل کر رہی ہیں اور ان کی پاسنگ آؤٹ تقریب قریب ہے۔ ان کی محنت اور عزم نہ صرف ان کے شوہر کی قربانی کو زندہ رکھے ہوئے ہیں بلکہ یہ پوری قوم کے لیے ایک مشعل راہ بن چکے ہیں۔
ثمرین کوثر کی ہمت اور قربانی کی کہانی ہر پاکستانی کے لیے ایک عظیم پیغام ہے۔ ان کا جذبہ یہ ثابت کرتا ہے کہ شہداء کا خون ہمیشہ وطن کے لیے لازوال محبت کی علامت رہتا ہے۔ نائیک آصف نواز شہید اور ان کی اہلیہ ثمرین کوثر جیسے عظیم لوگ ہمیشہ قوم کا فخر رہیں گے اور ان کی جدوجہد نسلوں تک یاد رکھی جائے گی۔
2024 میں عالمی سیاحت کی واپسی، 1.4 ارب افراد نے بین الاقوامی سفر کیا
معاہدے کی خلاف ورزی،اسرائیل کاجنوبی لبنان میں فوج کی تعیناتی برقرار رکھنے کا اعلان
