سعودی عرب میں کرفیو کا دورانیہ بڑھا دیا گیا

سعودی عرب میں کرفیو کا دورانیہ بڑھا دیا گیا

باغی ٹی وی :کورونا وائرس کے خلاف جاری مہم کے سلسلے میں‌ سختی کی گئی ہے. سعودی عرب میں کرونا وائرس کے پھیلاؤ کو روکنے کے لیے اضافی اقدامات کا اعلان کیا گیا ہے۔ وزارت داخلہ کے ایک ذمے دار نے جمعے کے روز بتایا کہ دمام شہر اور قطیف اور طائف کے ضلعوں میں کرفیو کے آغاز کا وقت بڑھا کر آج سہ پہر تین بجے کر دیا گیا ہے۔ کرفیو کا دورانیہ تاحکم ثانی جاری رہے گا۔ عہدے دارے کے مطابق سابقہ اعلان کردہ شعبے اور سرگرمیاں متعلقہ حکام کی جانب سے متعین کردہ صورت حال کے تحت کرفیو کی پابندی سے مستثنی ہوں گی۔

سعودی وزارت داخلہ نے مذکورہ شہروں اور ضلعوں کی آبادی کو باور کرایا ہے کہ یہ اقدام صحت عامہ کے حفظان کے لیے احتیاطی اور ضروری اقدامات میں سے ہے۔ لہذا تمام لوگ مفاد عامہ کو یقینی بنانے کے لیے سماجی تنہائی سے متعلق تدابیر پر کاربند رہیں۔

اس سے قبل وزارت داخلہ نے جمعرات کے روز مکہ مکرمہ اور مدینہ منورہ کے تمام علاقوں میں روزانہ 24 گھنٹے کے کرفیو کا اعلان کیا تھا۔ اس دوران دونوں شہروں میں داخل ہونے اور وہاں سے باہر جانے پر پابندی ہو گی۔ یہ فیصلہ تا حکم ثانی نافذ العمل رہے گا۔ اسی طرح دونوں شہروں کے رہائشی علاقوں میں ہر قسم کی تجارتی سرگرمی اور کام کو ممنوع قرار دیا گیا ہے۔ البتہ فارمیسیز، بینکنگ خدمات، راشن اور اشیائے خورد و نوش فروخت کرنے والے مراکز اور ایندھن کے اسٹیشنز اس فیصلے سے مستثنی ہوں گے.
واضح‌رہے کہ یک ہی دن میں سعودی عرب میں چھ ہلاکتیں ہوئی ہیں جس کے بعد ہلاکتوں کی مجموعی تعداد 16 ہو گئی ہے

سعودی وزارت صحت کے مطابق گزشتہ 24 گھنٹوں میں مزید 157افراد میں کرونا وائرس کی تصدیق ہوئی ہے جس کے بعد مریضوں کی مجموعی تعداد 1720 ہو گئی ہے. سعودی عرب میں کرونا وائرس سے اب تک 264 افراد صحتیاب ہو کر گھروں کو جا چکے ہیں،

سعودی وزارت صحت کے مطابق گزشتہ 24گھنٹے میں سب سے زیادہ مریض مدینہ منورہ میں سامنے آئے جن کی تعداد 78 ہے جبکہ مکہ مکرمہ میں 55، ریاض میں7، قطیف میں 6، جدہ اور الھفوف میں 3، 3،تبوک اور طائف میں 2، 2 اور الحناکیہ میں ایک شخص کا کرونا وائرس کا ٹیسٹ مثبت آیا.

قبل ازیں سعودی وزارت اسلامی امور دعوت و رہنمائی نے سعودی عرب کے مختلف علاقوں میں 8700 سے زیادہ مساجد میں 12 ہزار کارکنان کی مدد سے جراثیم کش محلول سے سپرے کرایا ہے- مساجد میں سپرے کورونا وائرس سے سعودی شہریوں اور مقیم غیر ملکیوں کو بچانے اور اس کے پھیلاؤ کو روکنے کے لیے احتیاطی تدبیر کے طور پر کیا گیا ہے.