لاہور (باغی ٹی وی) موجودہ سرحدی صورتحال کے تناظر میں انسپکٹر جنرل پنجاب پولیس ڈاکٹر عثمان انور نے صوبہ بھر، بشمول لاہور، میں سیکیورٹی سخت کرنے کا حکم دے دیا ہے۔ انہوں نے کہا کہ پنجاب پولیس موجودہ ملکی حالات کو مدنظر رکھتے ہوئے مکمل ہائی الرٹ ہے اور کسی بھی ہنگامی صورتحال سے نمٹنے کے لیے ہمہ وقت تیار ہے۔
آئی جی پنجاب کے مطابق پولیس کی آپریشنل، اسٹریٹیجک اور لاجسٹک تیاریوں کو مکمل کر لیا گیا ہے۔ ضلعی انتظامیہ، سول ڈیفنس، ریسکیو 1122 اور دیگر سیکیورٹی اداروں کے ساتھ مکمل کوآرڈینیشن قائم ہے تاکہ کسی بھی ممکنہ خطرے یا ہنگامی صورتحال میں بروقت ردعمل دیا جا سکے۔
ڈاکٹر عثمان انور نے بتایا کہ بین الصوبائی سرحدی پولیس چوکیوں سمیت تمام حساس اور اہم تنصیبات کی سیکیورٹی مزید سخت کر دی گئی ہے۔ انہوں نے ہدایت کی کہ ملکی اندرونی سرحدوں کے تحفظ کے لیے دہشت گردوں اور شرپسند عناصر پر کڑی نظر رکھی جائے۔
آئی جی پنجاب نے واضح کیا کہ پنجاب پولیس اپنی افواج کے شانہ بشانہ دشمن کے خلاف سیسہ پلائی دیوار بن چکی ہے۔ انہوں نے کہا کہ تمام آر پی اوز، ڈی پی اوز اور فارمیشنز کے سربراہان کو وار بک کے مطابق ہدایات جاری کر دی گئی ہیں تاکہ کسی بھی صورت حال سے مؤثر انداز میں نمٹا جا سکے۔
ڈی پی آر پنجاب پولیس کی جانب سے جاری کردہ بیان میں اس عزم کا اظہار کیا گیا ہے کہ پنجاب پولیس ملکی سالمیت کے تحفظ کے لیے ہر ممکن اقدام کرے گی۔
