
کشمور (باغی ٹی وی،نامہ نگار مختیاراعوان) ڈسٹرکٹ الیکشن کمیشن آف پاکستان نے سردار گورنمنٹ ہائیر سیکنڈری سکول میں ووٹ کے اندراج، منتقلی، اور درستگی کی اہمیت پر ایک سیمینار کا انعقاد کیا۔
ڈسٹرکٹ الیکشن کمشنر کشمور ستار نے سیمینار کی صدارت کرتے ہوئے "ووٹ کی اہمیت” پر خصوصی لیکچر دیا۔ انہوں نے کہا کہ پاکستان کا ہر وہ شہری جس کی عمر 18 سال سے زیادہ ہو اور اس کے پاس قومی شناختی کارڈ موجود ہو، ووٹ ڈالنے کا اہل ہے۔
انہوں نے مزید کہا کہ ملک میں خواتین ووٹرز کی تعداد مرد ووٹرز سے کم ہے اور تمام شہریوں کو چاہیے کہ وہ اپنے والدین اور خاندان کے دیگر افراد کے ووٹ کی رجسٹریشن کو یقینی بنائیں۔ اگر کسی کا ووٹ رجسٹرڈ نہیں ہے، تو فوری طور پر اس کا اندراج کرائیں تاکہ شفاف انتخابات میں شرکت ممکن ہو۔
سیمینار میں ڈسٹرکٹ الیکشن کمشنر نے الیکشن کمیشن کی آئینی ذمہ داریوں، ووٹ کی اہمیت، اور سیاسی عمل میں نوجوانوں کے کردار پر روشنی ڈالی۔ انہوں نے طلباء کو ووٹ کے اندراج اور منتقلی کے عمل کے بارے میں تفصیل سے آگاہ کیا۔
لیکچر کے اختتام پر طلباء کے سوالات کے جوابات دیتے ہوئے، الیکشن کمشنر نے شفاف انتخابی عمل کو یقینی بنانے کے لیے ہر ممکن تعاون کا عزم کیا۔ پروگرام میں معزز شرکاء نے بھی ووٹ کی اہمیت پر اپنے خیالات کا اظہار کیا۔