سینیٹ اجلاس: سینیٹ نے غزہ میں جاری اسرائیلی جنگی جرائم کے خلاف قرارداد منظور کر لی
قرارداد کی نقل تمام ممالک کے پارلیمانوں کو بھجوائی جائے گی ،قرارداد متفقہ طور پر پیش اور منظور کی گئی،قرارداد سینیٹر اسحاق ڈار نے پیش کی،قرارداد کے متن میں کہا گیا ہے کہ قرارداد پاکستان کے عوام کے جذبات کی ترجمانی کرتی ہے،قرارداد فلسطینی آذاد ریاست کی حمایت کرتی ہے،قرارداد فلسطین کے عوام کے حق خود ارادیت اور آذاد خودمختار ریاست کی حمایت کرتی ہے ،غزہ میں فوری جنگ بندی کا مطالبہ کرتی ہے،انسانی ہمدردی کی بنیادوں پر امداد کی فوری فراہمی اور محاصرے کے خاتمے کا مطالبہ کرتی ہے
ایوان بالا میں دو روز سے فلسطین کی حالیہ صورتحال پر بحث کا سلسلہ جاری ہے۔گزشتہ دو روز کے دوران نگران وزرا اور تمام جماعتوں کے سینیٹرز کی جانب سے ایوان میں فلسطینیوں سے اظہار یکجہتی کیا گیا.سینیٹ اجلاس میں سینیٹر عرفان صدیقی نے اظہار خیال کرتے ہوئے کہا کہ فلسطینی بہن بھائیو ہم کچھ نہیں کرسکے، کہنے کو مسلمان بہت ہیں لیکن راکھ کا ڈھیر ہیں، ہم دیکھ رہے کہ فلسطینی بستیاں قبرستان بن رہی ہے اور ہم کچھ نہیں کرسکے۔ عرفان صدیقی نے کہا کہ فلسطینیوں سے اتنی التجا ہے کہ روز محشر ہماری شکایت نہ کرنا، اگر شکایت کی بھی تو نبی کریم صلی اللہ علیہ وسلم سے چھپ کر کرنا ہم کس طرح انکا سامنا کریں گے
نگراں وفاقی وزیر اطلاعات مرتضیٰ سولنگی نے سینیٹ میں اظہار خیال کرتے ہوئے کہا کہمسئلہ فلسطین پر پاکستان کی ریاست، حکومت اور قوم یکجا ہیں، فلسطینی عوام کو ان کے حق سے محروم کیا گیا تو صیہونی نسل پرست اسرائیل کی ریاست قائم نہیں رہے گی۔
مسلم لیگ ن کے سینیٹر حافظ عبدالکریم نے سینیٹ میں عربی میں تقریر کی،سینیٹر حافظ عبدالکریم نے چیئرمین سینیٹ صادق سنجرانی سے استدعا کی کہ فلسطینیوں سے عربی میں اظہارِ یک جہتی کرنا چاہتا ہوں،چیئرمین سینیٹ نے کہا کہ ایوان اجازت دے تو ٹھیک ورنہ اردو اور انگریزی کے سوا ایوان میں تقریر نہیں کی جا سکتی،جس کے بعد سینیٹ کی جانب سے حافظ عبدالکریم کو عربی میں تقریر کرنے کے لیے خصوصی اجازت دی گئی
دوسری جانب اسپیکر قومی اسمبلی راجہ پرویز اشرف نے غزہ کے جبالیا پناہ گزین کیمپ پر اسرائیلی بمباری کی شدید مذمت کی اور کہا کہ غزہ کے جبالیا پناہ گزین کیمپ پر اسرائیلی فورسز کی بمباری پر شدید مذمت کرتا ہوں ،وحشیانہ بمباری کے نتیجے میں 100 سے زائد نہتے شہریوں کی شہادت انتہائی افسوس ناک ہے ،اسرائیل نے ظلم کی تمام حدیں پار کردیں ہیں ۔ اسرائیلی مظالم سے خواتین بچے اور امدادی کارکنان تک محفوظ نہیں ۔غزہ پر اسرائیلی بمباری سے اقوام متحدہ کے 64 امدادی کارکن ہلاک ہو چکے ہیں ۔ مغربی طاقتوں کی ایما پر اسرائیل کی جانب سے غزہ پر وحشیانہ بمباری کا سلسلہ فوری بند ہونا چاہیے ۔ اب وقت آگیا ہے کہ امت مسلمہ کو متحد ہو کر اسرائیل کی بربریت کا جواب دینا ہو گا ، پاکستان کی پارلیمان اور عوام عالمی برادری سے پرزور اپیل کرتے ہیں کہ اسرائیلی بربریت کا نوٹس لے ۔جنگ کسی مسئلے کا حل نہیں ہے عالمی طاقتوں کو بیٹھ کر مسئلہ فلسطین کا فوری اور دیر پا حل نکالنا چاہیے ۔ معصوم بچوں، خواتین اور بزرگوں کو اسرائیلی مظالم سے نجات دلانا پوری دنیا کی اجتماعی ذمےداری ہے ۔پاکستان فلسطینی بہن بھائیوں کی سیاسی اور اخلاقی مدد جاری رکھے گا ۔
ہسپتال پر ‘اسرائیلی حملہ’ ایک ‘گھناؤنا جرم’ ہے،سعودی عرب
الاہلی ہسپتال پر حملے کا اسرائیل کا حماس پر الزام،امریکی اخبار نے اسرائیلی جھوٹ کو کیا بے نقاب
