پارلیمنٹ لاجز میں شہباز گل کے زیراستعمال کمرے پرچھاپہ ،پستول اور سیٹلائیٹ فون برآمد

میرا جنسی استحصال ہوا، صحافی کے سوال پر شہباز گل کا جواب

پارلیمنٹ لاجز میں شہباز گل کے زیر استعمال کمرے پر چھاپہ مارا گیا ہے، پولیس پارٹی اپنے ہمراہ شہباز گل کو بھی لائی تھی۔ پاکستان تحریک انصاف (پی ٹی آئی) کے رہنما شہباز گل کے کمرے سے ایک پستول برآمد کیا گیا، شہبازگل کی رہائش گاہ سے ایک سیٹلائٹ فون بھی ملا ہے، جبکہ شہباز گل کے 2 پاسپورٹ بھی برآمد کیے گئے۔

پی ٹی آئی رہنما شہباز گل کو ہتھکڑیوں میں لایا گیا۔ ان کے کمرے سے پرس بھی برآمد ہوا ہے، چھاپے کے دوران ملنے والی اشیاء کی لسٹ بھی بنائی گئی۔شہباز گل نے کہا کہ کمرے سے ملنے والا میرا پرس ڈرائیور کے پاس ہوتا تھا۔شہباز گل پارلیمنٹ لاجز کے کمرہ نمبر ایف 206 میں رہائش پذیر تھے، ان کے کمرے کی الماری میں مہنگے سوٹ بھی رکھے ہوئے تھے۔

شہباز گل نے پستول کو اپنے ہاتھ میں لینے کے بعد اسے الٹ پلٹ کر دیکھا جس کے بعد انہوں نے اسے اپنا ماننے سے انکار کردیا۔پی ٹی آئی رہنما نے کہا کہ میرے پاس اے کے 47 ہے، جس کا لائسنس بھی موجود ہے۔شہباز گل نے اپنے بیان میں کہا کہ یہ پستول میرا نہیں ہے، جبکہ یہ کمرہ بھی میرے زیر استعمال نہیں ہے۔

پی ٹی آئی رہنما نے کہا کہ یہ کمرہ میرے گارڈز کے زیر استعمال ہے، یہ پستول بھی ان ہی کا ہوگا۔شہباز گل سے سوال کیا گیا کہ کیا ان پر جنسی تشدد کیا گیا ہے؟ جس کے جواب میں انہوں نے کہا کہ جی بالکل ہوا ہے۔

پولیس شہباز گل کو لیکر پنجاب ہاؤس روانہ ہو گئی ہے ،شہباز گل پنجاب ہاؤس میں بھی قیام پذیر رہے ہیں.