ننکانہ صاحب، باغی ٹی وی( نامہ نگار احسان اللہ ایاز )پاکستان مرکزی مسلم لیگ تحصیل شاہ کوٹ ضلع ننکانہ کے زیر اہتمام ایک عظیم الشان افطار ڈنر کا انعقاد کیا گیا، جس میں علاقے کی ممتاز سیاسی، سماجی، صحافی اور تاجر برادری کے افراد نے کثیر تعداد میں شرکت کی۔
اس افطار ڈنر میں ثاقب مجید جنرل سیکرٹری پاکستان مرکزی مسلم لیگ ضلع ننکانہ اور جاوید بھٹی چیئرمین رابطہ تنظیم پاکستان مرکزی مسلم لیگ ضلع ننکانہ سمیت دیگر اہم شخصیات نے شرکت کی۔
اس موقع پر سیکرٹری جنرل پاکستان مرکزی مسلم لیگ پروفیسر سیف اللہ خالد نے خطاب کرتے ہوئے کہا کہ رمضان المبارک صرف بھوک اور پیاس برداشت کرنے کا نام نہیں، بلکہ یہ مہینہ ایثار، قربانی، صبر اور غریب پروری کا درس دیتا ہے۔ انہوں نے کہا کہ بھوک کا حقیقی احساس تب ہی پیدا ہوتا ہے جب بندہ خود روزہ رکھے اور یہی احساس ہمیں معاشرے کے مستحق اور ضرورت مند طبقے کے دکھ درد میں شریک ہونے کی ترغیب دیتا ہے۔
پروفیسر سیف اللہ خالد نے مزید کہا کہ روزہ تزکیہ نفس کا بہترین ذریعہ ہے جو انسان کے اندر تقویٰ اور پرہیزگاری پیدا کرتا ہے۔ یہ ہمیں اپنی خواہشات پر قابو پانے اور اللہ کی رضا کے مطابق زندگی گزارنے کا سلیقہ سکھاتا ہے۔ انہوں نے امت مسلمہ کو پیغام دیا کہ ہمیں رمضان المبارک کی برکتوں سے فائدہ اٹھاتے ہوئے باہمی اتحاد، بھائی چارے اور محبت کو فروغ دینا چاہیے۔
افطار ڈنر میں شریک معزز شخصیات نے پاکستان مرکزی مسلم لیگ کی جانب سے اس محبت بھری محفل کے انعقاد کو سراہا۔
