fbpx

شہر قائد کوفراہمی آب کی میگا اسکیموں کے حوالے سےوزیر بلدیات کی زیر صدارت اجلاس

وزیر بلدیات سید ناصر حسین شاہ کی زیر صدارت شہرکوفراہمی آب کی میگا اسکیموں کے حوالے سے اجلاس

کراچی شہر کی پانی کی ضروریات کے پیش نظر عالمی اداروں کے تعاون سے متعدد منصوبہ جات پر کام کررہے ہیں، سیکرٹری بلدیات نجم احمد شاہ کی وزیر بلدیات کو بریفنگ

کراچی وزیر بلدیات سید ناصر حسین شاہ کی زیر صدارت محکمہ بلدیات سندھ میں اعلی سطح اجلاس کا انعقاد کیا گیا جس میں سیکرٹری بلدیات انجینئر سید نجم احمد شاہ نے وزیر بلدیات سندھ کو شہر کو فراہمی آب کے حوالے سے میگا اسکیموں اورعالمی اداروں کے تعاون سےجاری منصوبہ جات پر تفصیلی بریفنگ دی۔اجلاس میں ایڈ منسٹریٹر کراچی،ایم ڈی واٹر بورڈ، سیکرٹری پلاننگ،وائس چانسلر این ای ڈی یونیورسٹی، پراجیکٹ ڈائریکٹر KWSSIP سمیت دیگر افسران شریک تھے۔

سیکرٹری بلدیات سید نجم احمد شاہ نے وزیر بلدیات سندھ کو بریفنگ میں بتایا کہ شہرکی پانی کی ضروریات اور بڑھتی آبادی کے پیش نظرسائنسی بنیادوں پرایسا مکینزم تشکیل دیا جارہا ہے جس کے ذریعے تمام صنعتی و رہائشی علاقوں میں مستقل طور پر فراہمی آب اور سیوریج کی نکاسی کا بندوبست کیا جاسکے اور اس مقصد کی تکمیل کے لئے ورلڈ بینک سمیت تمام عالمی اداروں کے ساتھ کوآرڈینشن کا عمل جاری ہے۔وزیر بلدیات سید ناصر حسین شاہ نے خطاب کرتے ہوئے کہا کہ کراچی شہر کے اندر پینے کےصاف پانی کی فراہمی اورسیورج کے مسائل کا حل حکومت سندھ کی اولین ترجیحات میں شامل ہےاور میٹرو پولیٹن سٹی کا درجہ رکھنے والےشہر کراچی کے عوام کےلئےسہولیات کی فراہمی پاکستان پیپلز پارٹی کا منشورہے۔ وزیر بلدیات سندھ نے ایم ڈی واٹر بورڈ کو پانی چوروں کے خلاف کریک ڈاون میں مزید تیزی لانے کی ہدایت دیتے ہوئے کہا کہ کراچی کے پانی پر سب سے پہلا حق یہاں کے رہائشی افراد کا بنتا ہے۔کسی بھی فرد یا گروہ کو شہر کے لئے فراہم کردہ پانی چوری کرنے کی اجازت نہیں دی جائے گی۔ ناصر حسین شاہ نے تمام پمپنگ اسٹیشنوں سے بلا تعطل پانی کی فراہمی کا حکم دیتے ہوئے کہا کہ جن علاقوں سے پانی کی کمی کی شکایات موصول ہورہی ہیں ان تمام علاقوں میں سپلائی معمول کےمطابق لانے کے لئے ہنگامی بنیادوں پر اقدامات اٹھائے جائیں اور پیپلز پارٹی سندھ کے حصے کا پانی حاصل کرنے کے لئے جمہوری جدوجہد جاری رکھے گی۔

سیکرٹری لوکل گورنمنٹ سید نجم احمد شاہ نے وزیر بلدیات سندھ کو عالمی بینک کے تعاون سےجاری منصوبے کی رفتار اور کار کردگی کے متعلق بتاتے ہوئے کہا کہ بیرونی فنڈنگ کے ذریعے چلنے والے تمام پراجیکٹس کامیابی کےساتھ ترقی کی منازل طے کررہے ہیں اور غیر ملکی ماہرین اور پیشہ ورانہ کنسلٹنٹس کی قیمتی آرا سے بھی استفادہ حاصل کیا جارہا ہے۔ ناصر حسین شاہ نےمجموعی کارکردگی کو سراہتے ہوئے ادارہ جاتی رابطوں اور مشورہ سازی کے عمل پر زور دیا اور عزم ظاہر کیا کہ کراچی اور سندھ کی عوام کے لئے انتھک کاوشوں کا سلسہ مزید دراز اور تیز کیا جائے گا۔