سیالکوٹ: نجی ہسپتال کے کمرے سے نوجوان ڈاکٹر کی لاش برآمد، قتل کا مقدمہ درج

سیالکوٹ،باغی ٹی وی (بیوروچیف شاہد ریاض) سیالکوٹ کے صدر بازار میں واقع ایک نجی ہسپتال کے کمرہ نمبر 206 سے نوجوان ڈاکٹر خرم امتیاز کی لاش پراسرار حالت میں برآمد ہوئی ہے۔ اطلاع ملنے پر کینٹ پولیس نے موقع پر پہنچ کر لاش کو تحویل میں لے لیا، جبکہ فرانزک ٹیم نے بھی جائے وقوعہ کا معائنہ کیا۔

ڈاکٹر خرم امتیاز کی ہلاکت پر ان کے ماموں کی مدعیت میں نامعلوم افراد کے خلاف قتل کا مقدمہ درج کر لیا گیا ہے۔ مدعی نے الزام عائد کیا ہے کہ ڈاکٹر خرم کو نامعلوم افراد نے نامعلوم وجوہات کی بنیاد پر قتل کیا ہے۔

پولیس نے لاش کو پوسٹ مارٹم کے لیے علامہ اقبال ٹیچنگ ہسپتال منتقل کر دیا ہے اور واقعے کی تحقیقات کا آغاز کر دیا گیا ہے۔ پولیس حکام کا کہنا ہے کہ واقعے کی ہر پہلو سے چھان بین کی جا رہی ہے اور جلد حقائق سامنے لائے جائیں گے۔