ڈاکٹرغلام مصطفی بڈانی
سیالکوٹ (باغی ٹی وی، بیوروچیف شاہد ریاض)سیالکوٹ پولیس کی مؤثر تفتیش اور بھرپور پیروی کے نتیجے میں گینگ ریپ کے ایک افسوسناک کیس میں عدالت نے دو ملزمان کو عمر قید اور دس لاکھ روپے جرمانے کی سزا سنائی ہے۔
تفصیلات کے مطابق تھانہ صدر سیالکوٹ کے علاقے کوٹ کوڑا کے رہائشی ملزمان عمیر ارشد اور اسامہ ذوالفقار نے ایک 13 سالہ کم عمر محنت کش لڑکی کو ڈیڑھ ماہ تک اپنی درندگی کا نشانہ بنایا، جس کے باعث متاثرہ لڑکی حاملہ ہو گئی۔ واقعے کی اطلاع ملنے پر تھانہ صدر پولیس نے متاثرہ لڑکی کے والد محمد عارف کی درخواست پر فوری مقدمہ درج کیا۔
تفتیش کی ذمہ داری ایس ایس آئی او یو سیل کی انچارج خاتون افسر انسپکٹر رضیہ صابر کو سونپی گئی، جنہوں نے سائنسی بنیادوں پر شواہد اکٹھے کیے اور پیشہ ورانہ مہارت کے ساتھ دونوں ملزمان کو گرفتار کر کے عدالت میں چالان پیش کیا۔ پولیس کی محنت اور قانونی پیروی کے نتیجے میں عدالت نے دونوں مجرمان کو عمر قید، پانچ پانچ لاکھ روپے جرمانہ اور متاثرہ لڑکی کو آٹھ لاکھ روپے ہرجانہ ادا کرنے کا حکم دے دیا۔
ڈی پی او سیالکوٹ فیصل شہزاد نے انسپکٹر رضیہ صابر کی شاندار کارکردگی پر انہیں تعریفی سرٹیفیکیٹ اور نقد انعام دینے کا اعلان کیا ہے۔ انہوں نے کہا کہ معاشرے سے جرائم کے خاتمے اور قانون کی بالادستی کے لیے مجرموں کو قانون کے مطابق سزا دلوانا ناگزیر ہے۔ سیالکوٹ پولیس شہریوں کے جان و مال کے تحفظ کے لیے اپنی تمام تر صلاحیتیں بروئے کار لاتی رہے گی۔
