سیالکوٹ،باغی ٹی وی (بیوروچیف شاہدریاض)ایف آئی اے امیگریشن کی سیالکوٹ ایئرپورٹ پر بڑی کارروائی، تین مسافر گرفتار
تفصی کے مطابق ایف آئی اے امیگریشن نے سیالکوٹ ایئرپورٹ پر کارروائی کرتے ہوئے بیرون ملک گداگری اور جعلی دستاویزات پر سفر کرنے والے تین مسافروں کو گرفتار کر لیا۔ گرفتار ملزمان کی شناخت علی رضا، صہیب احسن اور محمد رضوان کے نام سے ہوئی۔
محمد رضوان فلائٹ نمبر FZ 315 کے ذریعے بحرین سے سیالکوٹ پہنچا تھا، جو بیرون ملک گداگری میں ملوث پایا گیا۔ تحقیقات کے دوران معلوم ہوا کہ ملزم سعودی عرب، دبئی اور بحرین میں گداگری کرتا رہا اور عمرہ ویزا و وزٹ ویزے کی آڑ میں غیر قانونی سرگرمیوں میں ملوث رہا۔ ملزم کو سعودی عرب اور بحرین میں سزا بھی دی گئی تھی اور ڈی پورٹ کر دیا گیا تھا۔ پاکستان واپسی پر ایف آئی اے نے اسے گرفتار کر لیا۔
علی رضا اور صہیب احسن فلائٹ نمبر PK 746 کے ذریعے سعودی عرب سے پاکستان پہنچے۔ امیگریشن کلیرنس کے دوران ان کے دستاویزات مشکوک پائے گئے۔ ابتدائی تفتیش میں علی رضا کے پاسپورٹ پر اٹلی کی ڈیپارچر اسٹیمپ جعلی نکلی۔ ملزم نے ایجنٹ کو 35 لاکھ روپے دے کر اٹلی جانے کی کوشش کی، تاہم کامیاب نہ ہو سکا۔ ایجنٹ نے پہلے اسے عمرہ ویزے پر سعودی عرب بھیجا اور بعد ازاں جعلی دستاویزات پر اٹلی بھیجنے کی کوشش کی جو ناکام رہی۔
صہیب اسلم کے پاسپورٹ پر گوئٹے مالا کے سفارت خانے کی اسٹیمپ جعلی نکلی اور پاسپورٹ پر دو صفحات بھی غائب تھے۔ ابتدائی تحقیقات میں ملزم نے بتایا کہ اس نے وسیم شاہ نامی ایجنٹ کو 70 لاکھ روپے دے کر امریکہ جانے کی کوشش کی تھی۔ ایجنٹ مختلف اوقات میں ملزم سے 30 لاکھ روپے وصول کر چکا تھا۔ ایجنٹ نے پہلے ملزم کو وزٹ ویزے پر آذربائیجان بھجوایا لیکن وہ ایک ماہ بعد واپس آ گیا۔ بعد میں اسے عمرہ ویزے پر سعودی عرب بھجوایا گیا، جہاں اس کے پاسپورٹ پر جعلی اسٹیمپ لگائی گئی اور امریکہ بھجوانے کی کوشش کی گئی، جو ناکام رہی۔
ایف آئی اے نے تینوں ملزمان کو گرفتار کر کے مزید قانونی کارروائی کے لیے انسدادِ انسانی سمگلنگ سرکل گوجرانوالہ منتقل کر دیا ہے۔ ترجمان ایف آئی اے کا کہنا ہے کہ انسانی سمگلنگ کے خلاف سخت کارروائیاں جاری رکھی جائیں گی۔
