سیالکوٹ (باغی ٹی وی، بیوروچیف شاہد ریاض)سیالکوٹ میں ڈکیتی اور چوری کی پانچ مختلف وارداتوں میں شہری ہزاروں روپے نقدی، موبائل فونز اور دیگر قیمتی سامان سے محروم ہو گئے۔ پولیس نے تمام واقعات پر مقدمات درج کر کے تفتیش شروع کر دی ہے۔
تفصیلات کے مطابق سرانوالی میں محمد عمران کے گھر میں چور داخل ہو کر 22 ہزار روپے نقدی اور موبائل فون لے اڑے جب کہ اسی علاقے میں ایک اور واردات میں نامعلوم چور آصف نواز کے گھر کی دیوار پھلانگ کر 10 ہزار روپے، تین موبائل فون اور دیگر سامان چرا کر فرار ہو گئے۔
کوٹلی نوشہرہ کے قریب دو نامعلوم ملزمان نے محمد آشان سے اسلحہ کے زور پر 30 ہزار روپے نقدی اور دو موبائل فون چھین لیے۔ اسی طرح ڈسکہ سے قاسم ذوالفقار جب ستو کے پلی کے قریب پہنچا تو تین مسلح ملزمان نے اس سے 3600 روپے اور موبائل فون چھین لیا۔
بہاری پور کے قریب بھی دو نامعلوم افراد نے گل افشاں کو اسلحے کے زور پر روک کر 50 ہزار روپے اور موبائل فون چھین لیا۔ پولیس نے تمام وارداتوں پر علیحدہ علیحدہ مقدمات درج کر لیے ہیں اور ملزمان کی تلاش جاری ہے۔
