سیالکوٹ (باغی ٹی وی بیوروچیف شاہد ریاض) تھانہ صدر کے علاقہ پکی کوٹلی میں خواجہ سراؤں کے ڈیرے پر پیش آنے والے ایک افسوسناک واقعے میں دو مسلح ملزمان نے تیز دھار آلے سے حملہ کر کے ایک خواجہ سرا کو قتل کر دیا جبکہ دو دیگر شدید زخمی ہو گئے۔
اطلاعات کے مطابق پکی کوٹلی کے علاقے میں خواجہ سرا بلال عرف بیلو کو تیز دھار آلے سے قتل کیا گیا۔ مزاحمت کرنے پر دو اور خواجہ سرا بھی شدید زخمی ہو گئے۔
واردات کے بعد ملزمان اپنا اسلحہ اور آلہ قتل موقع پر ہی چھوڑ کر فرار ہونے میں کامیاب ہو گئے۔ مقتول خواجہ سرا کی لاش پوسٹ مارٹم کے لیے سول ہسپتال منتقل کر دی گئی ہے۔ ایس ایچ او صدر میاں عبدالرزاق نے ابتدائی بیان میں واقعے کو دیرینہ رنجش کا شاخسانہ قرار دیا ہے۔
تھانہ صدر پولیس نے نامعلوم ملزمان کے خلاف مقدمہ درج کر کے تفتیش کا عمل شروع کر دیا ہے۔ ایس ایچ او میاں عبدالرزاق نے یقین دہانی کرائی ہے کہ پولیس بہت جلد ملزمان کو گرفتار کر لے گی۔ علاقے میں اس اندوہناک واقعے سے خوف و ہراس پھیل گیا ہے۔
