fbpx

سندھ حکومت کا 40 ہزار سے زائد نئی بھرتیوں کا فیصلہ

سندھ حکومت نے صوبے کے پڑھے لکھے افراد کو روزگار فراہم کرنے کا فیصلہ کرلیا۔

اے آر وائی نیوز کے مطابق سندھ حکومت نے محکمہ تعلیم میں 40 ہزار سے زائد نئی بھرتیاں کرنے کا فیصلہ کرلیا، ابتدائی طور پر پرائمری اور جونیئر ٹیچرز کی بھرتیاں کی جائیں گی۔

مراسلے کے مطابق بھرتیوں پر عملدرآمد 22 اگست سے کیا جائے گا، نئی بھرتیاں تھرڈ پارٹی آئی بی اے سکھر کے تعاون سے کی جائیں گی۔

ذرائع کے مطابق نان ٹیکنیکل آسامیوں پر ملازمین کی بھرتیوں کے اختیارات کمشنر، ڈپٹی کمشنرز کے سپرد کردئیے گئے ہیں۔

ایک سے 5 گریڈ تک بھرتیوں کے لیے ڈویژنل، ضلعی سطح پر سلیکشن کمیٹیاں قائم کی جائیں گی، ابتدائی طور پر 25 ہزار سے زائد بھرتیاں محکمہ تعلیم میں کی جائیں گی۔

ذرائع کا کہنا ہے کہ ملازمین میں نائب قاصد، چوکیدار ڈرائیور، مالہی اور خاکروب شامل ہیں۔

واضح رہے کہ 9 سال کے بعد نئی بھرتیوں کا عمل شروع کیا جائے گا، 2012 کے بعد نئی بھرتیوں پر پابندی عائد کی گئی تھی۔