اقوام متحدہ کی پچھترویں سالگرہ کی خوشی میں دفتر خارجہ میں خصوصی تقریب

اقوام متحدہ کی پچھترویں سالگرہ کی خوشی میں دفتر خارجہ اسلام آباد میں ’یو۔این‘ ریذیڈنٹ کوآرڈینیٹر آفس کے اشتراک سے خصوصی تقریب منعقد کی گئی۔ وزیر خارجہ مخدوم شاہ محمود قریشی نے تقریب میں خاص طور پر شرکت کی۔ سیکریٹری خارجہ سہیل محمود، اسلام آباد میں تعینات سفراء سفارتکاروں، اقوام متحدہ کے اداروں کے سربراہان اور اعلی حکام بھی توریب میں شریک ہوئے۔ اس موقعہ پر اقوام متحدہ کے سیکریٹری جنرل انتونیو گوتیرس نے وڈیو پیغام کے ذریعے تقریب سے خطاب کیا۔ وزیرخارجہ نے اس موقعہ پر کہا کہ سماجی ومعاشی بہتری کے مقاصد کے حصول کے لئے پاکستان کے ساتھ مل کر کام کرنے پر اقوام متحدہ کے تمام اداروں، فنڈز اور پروگرامز کا شکریہ ادا کرتے ہیں۔ انہوں نے کہا کہ بھارتی مقبوضہ جموں وکشمیر میں کشمیری عوام کی حالت زار انتہائی ابتر ہے۔ قابض بھارتی افواج منظم انداز میں انسانی حقوق کی سنگین خلاف ورزیاں کررہی ہے۔ شاہ محمود قریشی نے کہا کہ مقبوضہ وادی کے عوام شدید مصائب اور مظالم کا سامنا کرنے پر مجبور ہیں۔ اقوام متحدہ کی سلامتی کونسل کی قراردادوں میں کشمیریوں کو حق خود ارادیت دینے کی ضمانت دی گئی۔ سیکریٹری خارجہ سہیل محمود نے کہا کہ اقوام متحدہ کے منشور، قیام کے اغراض ومقاصد کے ساتھ پاکستان کی مکمل وابستگی کا عہد کرتے ہیں۔ انہوں نے اقوام متحدہ کے تمام اداروں میں پاکستان کی بھرپور شرکت کا جائزہ پیش کیا اورکہا کہ عالمی امن و سلامتی سے پائیدار ترقی اور انسانی حقوق تک ہر شعبے میں پاکستان کی شرکت نمایاں ہے۔
تقریب میں وزیر خارجہ شاہ محمود قریشی نے اقوام متحدہ کی پچھترویں سالگرہ کے موقع پر یادگاری ڈاک ٹکٹ کی رونمائی کی۔ یہ ڈاک ٹکٹ پاکستان پوسٹ نے جاری کیا ہے۔
اقوام متحدہ کی پچھترویں سالگرہ کے موقع پر تصویری نمائش کا بھی اہتمام کیا گیا۔ یادرہے کہ اقوام متحدہ کا دن ہر سال 24 اکتوبر کو منایا جاتا ہے۔ یہ دن 1945 میں اقوام متحدہ کے منشور کے نفاذ کی یاد دلاتا ہے

جواب چھوڑیں

آپ کا ای میل ایڈریس شائع نہیں کیا جائے گا.