ڈیجیٹل میڈیا کےاستعمال سے اداروں کی کارکردگی میں حیرت انگیز بہتری تحریر وقاص امجد

0
3

روایتی میڈیا  بتدریج قصہ پارینہ بنتا جا رہا ہے اور آہستہ آہستہ ڈیجیٹل میڈیا اسکی جگہ لے رہا ہے۔ جہاں آپ معلومات کے حصول کیساتھ ساتھ روزمرہ امور کو منظم انداز سے  پیش کرکے مزید بہتری کی  جانب بڑھتے ہیں۔ کسی بھی  عوامی تاثر  کو مثبت انداز سے پیش کرنے او ر مسائل کے حل  کیلئے ڈیجیٹل اور سوشل میڈیا کا استعمال انتہائی ناگزیر ہے ۔

یہی وجہ ہے کہ جوں جوں انفرادی طورپرڈیجیٹل میڈیاکارجحان بڑھا وہیں سرکاری ادارے بھی اسکے استعمال سے اپنی کارکردگی کو بہتر سے بہترکرنے کیلئے سرگرم ہونا شروع ہوگئے۔اپنی بات ،اپنے کام اور پیغام کو صحیح طریقے سے عوام الناس تک پہنچانے کا یہ جدیدذریعہ اتنا سہل ثابت ہوا ہے کہ پنجاب کے کئی اداروں نے اپنےدیگر شعبہ جات کیساتھ ساتھ ڈیجیٹل میڈیا کو بھی اپنی ترجیحات میں شامل کرلیا۔

آج سوشل اور الیکٹرانک میڈیا کی وجہ سے ہی ہم پنجاب کے  بلدیاتی اداروں کے کاموں کو  صرف کاغذوں پرہی نہیں بلکہ اپنی آنکھوں سے ناصرف دیکھ سکتے ہیں بلکہ انکے کام کے طریقہ کار کوبھی  سمجھ سکتے ہیں۔عصر حاضر کی اس سہولت سے  ہم اپنی کسی بھی قسم کی شکایت یا  رہنمائی کیلئے ان سے بغیر کسی رکاوٹ کے مدد مانگ سکتے ہیں۔ پنجاب بھرکے وزراء، کمشنرز ، ڈپٹی کمشنرز،اسسٹنٹ کمشنرز غرض تمام افسران اپنی کارکردگی کوبذریعہ ڈیجیٹل میڈیا عوام تک پہنچاتے ہیں ۔

دیکھا جاسکتا ہے کہ اس جدت کو اپنانے میں پنجاب فوڈ اتھارٹی پیش پیش رہی ہے۔ماضی قریب میں جتنے اچھے طریقے سے پنجاب فوڈ اتھارٹی نے ڈیجیٹل میڈیا کا استعمال کیا ،اسکی نظیر  نہیں ملتی ۔پہلے پہل اس ادارے کے قیام کا مقصد  لوگوں کو مضر صحت اشیاءکی خریدو فروخت سے روکنا تھا ،بعدازاں عوام الناس کی آگاہی کیلئے روایتی میڈیا کیساتھ ڈیجیٹل میڈیا کااستعمال شروع کیا گیا تو اسکے بھی  خاطر خواہ نتائج سامنے آنے لگے۔ لوگ یہ جاننے لگے  کہ کونسی چیز صحیح ہے اور کسی کی افادیت زیادہ ہے جبکہ کونسی چیز کھانے سے بیماریوں میں مبتلا ہونے کا اندیشہ ہے ۔ ایک سرکاری ادارے کے اس احسن قدم سے لوگوں کو وسیع پیمانے  پر آگاہی ملی اور وہ پہلے کی نسبت زیادہ بہتر طریقے سے کھانے پینے کی اشیا  ءکوخریدنے میں احتیاط برتنا شروع ہوگئے۔

بدلتے وقت کے تقاضوں کیساتھ جہاں گلی محلوں کی صفائی ستھرائی کے  پرانے طریقہ کارکو  ختم کیا گیا وہیں پنجاب کی   ویسٹ مینجمنٹ کمپنیز نےبذریعہ  ڈیجیٹل میڈیا پورے پنجاب میں اپنے کام کواس انداز سے لوگوں میں روشناس کروایا  کہ بھولی بھالی عوام کو بھی اس بات کا احساس ہوا کہ کئی کئی روز سے گلیوں  میں پڑا گند آس پاس کے ماحول کیساتھ ساتھ انکی اور انکے پیاروں کی صحت کیلئےبھی نقصان دہ ہے۔ اسی لیے اب ماضی کی طرح خط وکتاب کی بجائے  ڈیجیٹل میڈیا کے استعمال سےکوڑا کرکٹ کی نشاندہی اور اسے فوری ٹھکانے لگانے کی حکمت عملی میں حیران کن تیزی سامنے آئی ہے ۔

غرض عوامی خدمت کے لیے موجود تمام اداروں میں میڈیا ڈیجیٹلائزیشن کی ایسی فضا قائم ہورہی ہے کہ جس سے جہاں خلق خدا کو بے حدفائدہ ہورہا ہے وہیں حکومت کو بھی اپنی خدمات اور پیغامات  نچلی سطح تک براہ راست  پہنچانے کا بہترین موقع مل رہا ہے۔

Twitter Id

@waqas_amjaad

Leave a reply