سوشانت سنگھ کے ڈریم پروجیکٹ کی شوٹنگ نے مداحوں کو سوگوار کردیا

بالی وڈ کے آنجہانی اداکار سوشانت سنگھ راجپوت کی ڈریم پروجیکٹ’چندا ماما دور کے‘ کی شوٹنگ شروع ہونے پر مداح سوگوار ہو گئے-

باغی ٹی وی :گزشتہ سال جون میں اداکار سوشانت سنگھ راجپوت اپنے گھر میں مردہ پائے گئے تھے اور انہوں نے پنکھے سے لٹک کر خودکشی کی تھی۔

بھارتی میڈیا رپورٹس کے مطابق اداکار نے خودکشی سے قبل کئی فلمیں سائن کی تھیں جس میں سے ایک فلم ’چندا ماما دور کے‘ بھی تھی۔ اس فلم میں سوشانت کو خلاباز کا کردار ادا کرنا تھا لیکن یہ ڈریم پروجیکٹ اداکار کی زندگی میں شروع ہی نہ ہوسکا۔

اب اس فلم کی شوٹنگ شروع ہونے کی خبروں نے ان کے مداحوں کو سوگوار کردیا ہے اور مداح ناخوش بھی ہیں جس کا اظہار سوشل میڈیا پر کیا جارہا ہے۔

واضح رہے کہ اس فلم کا اعلان 2017 میں کیا گیا تھا اور اس کیلئے سوشانت نے باقاعدہ طور پر ناسا سے تربیت بھی حاصل کی تھی دوسری جانب فلم کے ہدایتکار سنجے پورن سنگھ نے کہا کہ فلم میں سوشانت کی جگہ دوسرے اداکار کو کاسٹ کرنا مشکل ہے تاہم فلم میں انہیں خراج عقیدت پیش کیا جائے گا۔