Tag: Ghani Mehmood Kasuri

قصور
رائیونڈ روڈ پر دن دیہاڑے بڑی واردات ،شہریوں میں شدید خوف و ہراس،سی سی ڈی قصور سے فوری کاروائی کا مطالبہ

تفصیلات کے مطابق قصور میں آج صبح دن دیہاڑے ایک واردات نے مہینوں سے ہوئے سکون کو برباد کر کے رکھ دیا ہے
آج صبح بوقت 8:30 پر محمد ندیم ولد عاشق قوم سیال جٹ،محمد امین اور اس کا حقیقی چھوٹا بھائی محمد امین الگ الگ موٹر سائیکلوں پر قصور سے دودھ فروخت کرکے واپس اپنے گاؤں سکنہ اوراڑہ نو آ رہے تھے کہ رائیونڈ روڈ پر گیس فیکٹری کے قریب پیچھے سے آنے والے سی جی ون ٹو فائیو سوار دو نقاب پوش مسلح ڈاکوؤں نے چلتی سڑک پر روک لیا اور اسلحہ کے زور پر ندیم سے مبلغ 70000 اور امین سے 35000 روپیہ نقدی اور ساتھ میں قیمتی موبائل فون مالیت 40000 چھین کر بآسانی فرار ہو گئے
واضع رہے کہ قصور و گردونواح میں کچھ ماہ سے ڈکیتی کی وارداتوں سے بہت حد تک کمی تھی آج اس دن دیہاڑے کی واردات نے پورے علاقے کو ایک بار پھر سے خوف میں مبتلا کر دیا ہے
واردات پر تھانہ راجہ جنگ قصور میں درخواست دائر کر دی گئی ہے
اہلیانِ علاقہ نے تھانہ راجہ جنگ پولیس و سی سی ڈی قصور سے فوری نوٹس لے کر انصاف کا مطالبہ کیا ہے

تفصیلات کے مطابق قصور کی تحصیل پتوکی میں پولیس اہلکاروں نے مبینہ زیادتی کرتے ہوئے بیوہ خاتون کی زمین پر قبضہ کرانے کی کوشش کی
تھانہ صدر پتوکی کی حدود چک نمبر 7 میں رات کے وقت نامعلوم پولیس اہلکار مبینہ طور پر ایک بیوہ خاتون کی زمین پر دوسری پارٹی کو قبضہ دلوانے کے لیے پہنچ گئے
متاثرہ خاتون کا کہنا ہے کہ مذکورہ زمین کا معاملہ عدالت میں زیر سماعت ہے اور اسٹے آرڈر بھی موجود ہے تاہم اس کے باوجود پولیس نے زبردستی قبضہ کرانے کی کوشش کی ہے

خاتون نے الزام لگایا کہ مزاحمت پر پولیس اہلکاروں نے اس کے کپڑے بھی پھاڑ دییے
علاقہ مکینوں نے اس کارروائی کو غیر قانونی اور ظلم قرار دیا ہے ان کا کہنا ہے کہ بیوہ عورت کے ساتھ ایسا سلوک کھلی ناانصافی اور قانون کی سخت ترین خلاف ورزی ہے
علاقہ کے شہریوں نے وزیر اعلیٰ پنجاب، آئی جی پنجاب پولیس اور ڈی پی او قصور سے مطالبہ کیا ہے کہ معاملے کی غیر جانب دارانہ انکوائری کرائی جائے اور متاثرہ خواتین کو انصاف فراہم کیا جائے

قصور
حاضر سروس پولیس ملازم پر کتا چھوڑ دیا،مقدمہ درج

تفصیلات کے مطابق گلبرگ کالونی قصور میں معمولی بات پر شہری نے پولیس کانسٹیبل پر پالتو کتا چھوڑ دیا جس سے پولیس کانسٹیبل زخمی ہو گیا گلبرگ کالونی قصور کا رہائشی کانسٹیبل محمد نعیم حالیہ تعینات تھانہ صدر قصور نے پولیس تھانہ صدر قصور میں درخواست دائر کرتے ہوئے مؤقف اختیار کیا کہ میں گھر سے تھانہ جا رہا تھا کہ راستہ میں اسے زیاد ڈوگر ہمراہ دو افراد نامعلوم نے روک لیا اور کہا ہم دشمن دار لوگ ہیں اسی لیے یہ راستہ ہم نے بند کر دیا ہے جس باعث بات تلخ کلامی کی طرف گئی تو زیاد ڈوگر نے اپنا پالتو کتا چھوڑ دیا
کتے نے اسے کاٹ کر زخمی کر دیا
پولیس نے مختلف دفعات کے تحت مقدمہ درج کرکے تفتیش شروع کر دی ہے

قصور
سبزیوں و پھلوں کی قیمتوں میں اضافے سے عوام پریشان،نوٹس کی اپیل

تفصیلات کے مطابق قصور میں آج شہریوں نے ایک بار پھر سبزیوں و پھلوں کی قیمتوں میں نمایاں اضافہ محسوس کیا ہے جس نے گھریلو بجٹ پر بوجھ بڑھا دیا ہے

قصور کی مقامی منڈیاں روزانہ کی بنیاد پر قیمتیں فراہم کرتی ہیں لیکن عوام کا کہنا ہے کہ عام بازار میں قیمتیں سرکاری نرخوں سے کہیں زیادہ ہیں
مقامی لوگ شکایت کر رہے ہیں کہ سبزی منڈی روڈ کی حالت خراب ہے، سڑک نہ بننے کی وجہ سے ٹرانسپورٹ اور رسد کے اخراجات میں اضافہ ہوا ہے، اور یہ اضافہ قیمتوں میں منتقل ہو رہا ہے
قیمتوں کے بڑھنے کی کئی وجوہات اور بھی ہیں جن میں بارشوں سے نقصانات، ذخیرہ اندوزی، اور مانگ و رسد کا عدم توازن شامل ہے

آلو، ٹماٹر اور پیاز،انگور،سیب وغیرہ کی قیمتیں حالیہ ہفتوں میں تیزی سے اوپر گئیں ہیں
جبکہ لہسن اور ادرک جیسی مصالحہ جات خاص طور پر مہنگی ہو رہی ہیں
شہریوں کا کہنا ہے کہ تنخواہیں اور آمدنی وہی ہیں مگر کچن کے اخراجات پورے خاندان پر اثر انداز ہو رہے ہیں
شہریوں نے مقامی انتظامیہ سے مطالبہ کیا ہے کہ سرکاری نرخ نامے پر عمل کرایا جائے اور منڈی کمیٹی یا ٹرانسپورٹرز کی مانیٹرنگ بہتر ہو تو کافی حد تک فائدہ ہو گا

قصور
سب ڈویژن بابا بلہے شاہ میں بجلی کی طویل بندش، عوام پریشان،ایس ڈی او کا اے سی روم میں آرام

تفصیلات کے مطابق قصور لیسکو کی سب ڈویژن بابا بلہے شاہ قصور میں بجلی کی غیر اعلانیہ طویل لوڈشیڈنگ نے عوام کی زندگی اجیرن بنا دی ہے
شہریوں کے مطابق گزشتہ کئی دنوں سے روزانہ پانچ پانچ گھنٹے تک بجلی بند کی جا رہی ہے جس سے گھروں اور کاروباروں میں شدید مشکلات پیش آ رہی ہیں

عوام نے بتایا ہے کہ شکایات درج کروانے کے لئے واپڈا آفس کال کی جائے تو فون ریسیو نہیں کیا جاتا اور بار بار کوشش پر لائن بزی کر دی جاتی ہے رہائشیوں کا کہنا ہے کہ ایس ڈی او صاحب خود اے سی والے کمرے میں آرام فرما رہے ہوتے ہیں جبکہ گرمی اور حبس میں عوام پریشانی اور اذیت کا شکار ہیں

شہریوں نے ڈپٹی کمشنر قصور اور ایس ای لیسکو واپڈا قصور سے مطالبہ کیا ہے کہ بجلی کی غیر اعلانیہ بندش اور عوامی مسائل کا حل یقینی بنائیں اور ایس ڈی او و دیگر عملے کو لوگوں کی شکایات سننے اور ان کے حل کرنے کا پابند بنائیں

قصور
دریائے ستلج میں پانی کی سطح میں اتار چڑھاؤ جاری

تفصیلات کے مطابق قصور میں دریائے ستلج میں پانی کی سطح میں اتار چڑھاؤ جاری ہے آج صبح 6 بجے کی تازہ ریڈنگ کے مطابق تلوار پوسٹ پر سطح 5.40 فٹ ریکارڈ کی گئی ہے
جبکہ کیکر پوسٹ پر پانی کی سطح 19.70 فٹ اور ڈسچارج 78 ہزار 492 کیوسک ریکارڈ ہوا ہے
اسی طرح بکارکے پوسٹ کا ریفرنس لیول 624.10 اور فتح محمد پوسٹ پر پانی کی سطح 10.90 فٹ رہی ہے

ماہرین کے مطابق اگرچہ تلوار پوسٹ پر صورتحال قابو میں ہے تاہم کیکر پوسٹ اور ڈسچارج کے بڑھتے ہوئے بہاؤ کے باعث نشیبی علاقوں میں پانی داخل ہونے کا خدشہ موجود ہے
ضلعی انتظامیہ قصور اور ریسکیو ٹیموں کو ہائی الرٹ ہیں
ضلعی انتظامیہ قصور نے عوام سے گزارش کی ہے کہ وہ افواہوں پر کان نہ دھریں اور انتظامیہ کی جانب سے جاری کردہ ہدایات پر عمل کریں
دوسری جانب ملک بھر سے فلاحی جماعتوں کا دریائے ستلج قصور میں سیلاب زدگان کے لئے ریسکیو و ریلیف آپریشن جاری ہے
سب سے بڑا آپریشن پاکستان مرکزی مسلم لیگ کر رہی ہے جو روزانہ ہزاروں لوگوں کو پکا پکایا کھانا،صاف پانی،خیمے،راشن پیک،ادویات اور جانوروں کو چارہ مہیا کر رہی ہے

قصور
الہ آباد میں شہری کی قیمتی جائیداد خرد برد کرنے کا انکشاف،پٹواری کے خلاف کاروائی کا مطالبہ

تفصیلات کے مطابق قصور کی تحصیل چونیاں کے قصبہ الہ آباد میں سرکل پٹوار تلونڈی کے پٹواری آس محمد پر شہری کی قیمتی جائیداد ریکارڈ میں ہیر پھیر کے ذریعے خرد برد کرنے کا الزام سامنے آیا ہے

متاثرہ شہری محمد مشتاق نے محکمہ اینٹی کرپشن کو درخواست دیتے ہوئے مؤقف اختیار کیا ہے کہ متعلقہ پٹواری نے ریکارڈ میں تبدیلی کرکے اس کی زمین کو راستہ ظاہر کر دیا جس سے اسے شدید مالی و جائیدادی نقصان کا خدشہ ہے

محمد مشتاق کے مطابق یہ جعلسازی باقاعدہ منصوبہ بندی کے تحت کی گئی تاکہ زمین کو اس کی ملکیت سے نکال کر عام راستہ قرار دیا جا سکے

دوسری جانب پٹواری آس محمد نے الزامات کی تردید کرتے ہوئے کہا ہے کہ یہ ریکارڈ سابقہ ادوار میں ہی تبدیل کیا جا چکا تھا اس میں میرا کوئی عمل دخل نہیں ہے

ذرائع کے مطابق اینٹی کرپشن حکام نے درخواست وصول کر کے معاملے کی تحقیقات شروع کر دی ہیں، اور اصل ریکارڈ کی چھان بین کی جا رہی ہے

قصور
آٹے کی قیمتوں میں اضافہ،شہری سخت پریشان،نوٹس کی اپیل

تفصیلات کے مطابق قصور میں گزشتہ 1 ماہ کے دوران آٹے کی قیمت میں نمایاں اضافہ دیکھنے میں آیا ہے
سرکاری ریٹس کے مطابق مارکیٹ میں 20 کلو آٹے کا تھیلا 1,400 روپیہ سے بڑھ کر 1,810 روپیہ تک جا پہنچا ہے یعنی صرف ایک ماہ میں 410 روپیہ کا اضافہ ریکارڈ کیا گیا ہے تاہم یہ سرکاری ریٹس ہیں جس پر فراہمی بہت کم ہے 10 کلو آٹے کا تھیلا سرکاری طور پر 905 روپیہ کا ہے جبکہ آٹا چکیوں اور دیگر دکانوں سے 1100 تک فی 10 کلو فروخت ہو رہا ہے

ضلعی انتظامیہ کے مطابق مہنگائی کی بڑی وجہ ذخیرہ اندوزی اور فلڈ کے باعث سپلائی میں کمی ہے
اسی دوران ضلع قصور میں کارروائی کرتے ہوئے 18,700 آٹے کے تھیلے ضبط کئے گئے ہیں تاکہ مصنوعی بحران پر قابو پایا جا سکے

شہریوں کا کہنا ہے کہ سرکاری نرخ اور مارکیٹ ریٹ میں فرق کے باعث انہیں مہنگا آٹا خریدنا پڑ رہا ہے اور اگر بروقت اقدامات نہ کئے گئے تو آنے والے دنوں میں صورتحال مذید خراب ہو سکتی ہے پیرا فورس اپنا کردار ادا کرے اور فلور ملوں کے خلاف بھی کاروائی کرے تاکہ اصل قیمت تک تاجروں تک پہنچے اور وہ اصل قیمت پر فروخت کر سکیں

قصور
دریائے ستلج قصور میں پانی کی سطح بدستور مستحکم،

تفصیلات کے مطابق دریائے ستلج قصور میں پانی کی سطح بدستور بلند ہے تاہم آج صبح 9 بجے پاک رینجرز اور محکمہ آبپاشی کی مشترکہ پیمائش کے مطابق صورتحال نسبتاً مستحکم دیکھی گئی ہے
تلور پوسٹ پر سطح آب 11.30 فٹ ریکارڈ ہوئی ہے اور
ڈاؤن اسٹریم فیروزپور ہیڈ ورکس کیکر پوسٹ پر 23.00 فٹ پانی کی پیمائش کی گئی جبکہ کل اخراج 2,61,053 کیوسک نوٹ کیا گیا ہے
بکارکے پوسٹ پر ریڈیوس لیول
626.90 رہا جبکہ
فتح محمد پوسٹ پر پانی کی سطح 15.10 فٹ ریکارڈ ہوئی

محکمہ آبپاشی اور ریسکیو ذرائع کے مطابق ستلج اور دیگر دریاؤں میں مسلسل بلند سطحوں کے باعث پنجاب کے مختلف نشیبی علاقے خطرے کی زد میں ہیں
حکام کا کہنا ہے کہ اب تک لاکھوں افراد نقل مکانی کر چکے ہیں جبکہ امدادی کارروائیاں فوج، ریسکیو ادارے اور رضاکاروں کے تعاون سے جاری ہیں
بین الاقوامی میڈیا رپورٹس کے مطابق بھارت کی جانب سے پانی کے مسلسل اخراج نے سیلابی خطرات میں اضافہ کر دیا ہے جس کے نتیجے میں پنجاب میں لاکھوں افراد متاثر ہوئے اور کئی اضلاع میں کھیت کھلیان زیر آب آ گئے

ماہرین کا کہنا ہے کہ اگر پانی کے بہاؤ میں مذید اضافہ ہوا تو نشیبی علاقوں میں مذید نقصان کا خدشہ ہے تاہم موجودہ اعداد و شمار مستحکم مگر نازک صورتحال کو ظاہر کرتے ہیں