fbpx

تحریک لبیک کی کچھ باتیں مانی ہیں، گورنر سندھ

گورنر سندھ عمران اسماعیل کا کہنا ہے کہ تحریک لبیک پاکستان کی کچھ باتیں مانی ہیں اور کچھ ان کو سمجھائی ہیں۔کراچی میں ڈاکٹر مسرور سیال کے گھر پر آمد کے موقع پر میڈیا سے گفتگو کرتے ہوئے گورنر سندھ نے کہا کہ کل وزیراعظم عمران خان نے دنیا کے مسلم لیڈرز کو سمجھانے کی کوشش کی ہے۔عمران اسماعیل نے کہا کہ فرانس کے صدر نے مذہب کی توہین کی جس سے مسلمانوں کی دل آزاری ہوئی، ہولوکاسٹ کے خلاف بات کرنے پر دل آزاری سمجھا جاتا ہے۔ انہوں نے کہا کہ ہم نبی کے غلام ہیں ان کی حرمت سب سے اہم ہے اور نبی کے صدقے ہم ہیں۔سندھ کی حالت زار سے متعلق گورنر نے کہا کہ سندھ آج بھی پسماندہ صوبہ ہے لیکن ہم یہاں کے لوگوں کی تکالیف کو کم کریں گے۔ ہم سندھ کے لوگوں کو کسی کے رحم وکرم پر نہیں چھوڑیں گے۔انہوں نے کہا کہ سندھ اور وفاق میں ایک حکومت ہونا ضروری نہیں کیونکہ اٹھارویں ترمیم کے بعد صوبے کی ذمہ داری زیادہ آتی ہے۔گورنر سندھ نے کہا کہ ٹھٹہ کا دورہ عمران خان کی خواہش پر کرنے جا رہا ہوں جس کی رپورٹ وزیراعظم کو دوں گا۔ وزیراعظم آئندہ سندھ کے دیگر علاقوں کا دورہ کریں گے۔اس سے قبل گورنر سندھ نے پی ٹی آئی ملیر کے رہنما ڈاکٹر مسرور سیال سے چچا کے انتقال پر تعزیت کی۔ اس دوران اپوزیشن لیڈر حلیم عادل شیخ و دیگر رہنما بھی ساتھ تھے.

جواب چھوڑیں

آپ کا ای میل ایڈریس شائع نہیں کیا جائے گا.