fbpx

بلاول بھٹو اوراسعد محمود کے درمیان ٹیلی فونک رابطہ

وزیر خارجہ بلاول بھٹو زرداری اور وفاقی وزیر برائے مواصلات مولانا اسعد محمود کے درمیان ٹیلی فونک رابطہ ہوا۔

تفصیلات کے مطابق ٹیلی فونک رابطے کے دوران قومی اسمبلی میں جمعیت علمائے اسلام کے پارلیمانی لیڈر مولانا اسعد محمود نے چیئرمین پیپلز پارٹی بلاول بھٹو زرداری کو عیدالاضحی کی مبارک باد دی۔

پاکستان پیپلزپارٹی کے چیئرمین و وزیر خارجہ بلاول بھٹو زرداری اور وزیراعظم شہباز شریف کے درمیان ٹیلی فونک رابطہ ہوا ہے۔

ٹیلیفونک رابطے کے دوران وزیراعظم شہباز شریف نے چیئرمین بلاول بھٹو زرداری کو عید کی مبارک باد دی۔چیئرمین بلاول بھٹو زرداری اور وزیراعظم شہباز شریف کے درمیان باہمی دلچسپی کے امور پر بھی تبادلہ خیال ہوا۔

یاد رہے کہ اس سے پہلے وزیراعظم شہباز شریف نے ایران کے صدر سید ابراہیم رئیسی سے ٹیلیفونک رابطہ کیا۔ اپنی خوشگوار گفتگو کے دوران دونوں رہنماؤں نے عید کی مبارکباد کا تبادلہ کیا اور دو طرفہ تعلقات پر تبادلہ خیال کیا۔

وزیراعظم شہباز شریف نے پاک ایران جغرافیائی قربت، مشترکہ تاریخ اور باہمی افہام و تفہیم کے حوالے سے تاریخی تعلقات کی اہمیت اجاگر کی۔ انہوں نے تجارت، توانائی، بجلی اور دونوں ممالک کے آپس کے روابط سمیت باہمی تعاون کے تمام شعبوں میں دوطرفہ تعلقات کو فروغ دینے کے لیے اپنی حکومت کے مضبوط عزم کا اعادہ کیا۔