چین اورامریکہ کے درمیان کشیدگی شدت اختیارکرنے لگی : امریکہ کی 11 اہم شخصیات پر پابندی عائد

بیجنگ: چین اورامریکہ کے درمیان کشیدگی شدت اختیارکرنے لگی : امریکہ کی 11 اہم شخصیات پر پابندی عائد،اطلاعات کے مطابق امریکی اقدام کے بعد جواب میں چین کی جانب سے بھی امریکی سینیٹرز مارکو روبیو اور ٹیڈ کروز سمیت 11 اہم شخصیات پر پابندیاں عائد کردی گئیں۔

بین الاقوامی میڈیا رپورٹس کے مطابق چین اور امریکا کے درمیان تناؤ اور کشیدگی میں مزید اضافہ ہوگیا ہے، ہانگ کانگ کی سی ای او سمیت متعدد اعلیٰ حکام اور چینی شہریوں پر امریکا کی جانب سے سیاسی آزادی سلب کرنے کے الزام میں عائد کی جانے والی پابندیوں کے جواب میں چین نے بھی دو سینیٹرز سمیت 11امریکی شہریوں پر پابندی عائد کردی ہے۔

چین کی جانب سے جاری بیان میں کہا گیا ہے کہ جن امریکی سینیٹرز اور شخصیات پر پابندیاں عائد کی گئی ہیں انہوں نے ہانگ کانگ میں چین کے قومی سلامتی بل سے متعلق نامناسب برتاؤ کیا اور غیر ذمہ دارانہ بیانات دیئے تاہم امریکی شخصیات پر پابندی کی نوعیت سے آگاہ نہیں کیا گیا۔

چین نے جن 11 امریکی شہریوں بشمول قانون سازوں پر پابندیاں لگائی ہیں ان میں غیر منافع بخش اداروں اور رائٹس گروپس سے وابستہ افراد بھی شامل ہیں۔

چین کی وزارت خارجہ کے ترجمان ژاؤ لیجیان نے باقاعدہ پریس بریفنگ میں بتایا کہ اس غلط امریکی سلوک کے جواب میں چین نے ان افراد پر پابندیاں عائد کرنے کا فیصلہ کیا ہے جنہوں نے ہانگ کانگ سے متعلقہ معاملات پر بدتمیزی کی ہے لیکن انہوں نے یہ واضح نہیں کیا گیا کہ ان افراد پر کیا پابندیاں لگائی گئی ہیں۔