fbpx

انڈس ہائی وے پر خوفناک حادثہ، 15 افراد جاں بحق:بلاول بھٹو،مراد علی شاہ کا اظہارافسوس

جامشورو: انڈس ہائی وے پر خوفناک حادثہ، 15 افراد جاں بحق ،اطلاعات کے مطابق انڈس ہائی وے مانجھند کے قریب مسافر وین اور ٹریک میں خوفناک تصادم ہوا جس کے نتیجے میں 15 افراد جاں بحق ہوگئے۔

ذرائع کے مطابق ضلع جامشورو میں انڈس ہائی وے مانجھند کے قریب مسافر وین اور ٹرک میں خوفناک تصادم ہوا ہے جس کے نتیجے میں 15 افراد جاں بحق اور 6 زخمی ہوگئے ہیں۔حادثے کی اطلاع ملتے ہی پولیس اور ریسکیو ادارے جائے حادثہ پر پہنچ گئے اور امدادی سرگرمیاں شروع کردیں۔ لاشوں اور زخمیوں کو مانجھند اسپتال منتقل کیا گیا ہے۔

ریسکیو ذرائع کے مطابق حادثے میں زخمی ہونے والے متعدد افراد کی حالت تشویشناک ہے جب کہ جاں بحق افراد میں خواتین اور بچے بھی شامل ہیں۔ریسکیو ذرائع نے بتایا کہ حادثہ تیز رفتاری کے باعث پیش آیا ہے۔ مسافر وین دادو سے حیدرآباد آرہی تھی جبکہ ٹرک سہون جارہا تھا حادثے کے نتیجے میں وین مکمل تباہ ہوگئی ہے۔

ادھروزیر اعلیٰ سندھ سید مراد علی شاہ نے انڈس ہائی وے مانجھند کے قریب وین اور ٹرک کے تصادم پر گہرے افسوس کا اظہار کیا ہے۔

تفصیلات کے مطابق وزیر اعلیٰ سندھ نے کمشنر حیدرآباد، ڈی سی اور ایس ایس پی جامشورو کو ہدایات جاری کردیں، وزیر اعلیٰ سندھ نے جاں بحق ہونے والوں کے ورثاء سے ہر قسم کی بھرپور تعاون کرنے کی ہدایت کی۔

سید مراد علی شاہ کا کہنا تھا کہ زخمیوں کو فوری طور پر قریبی اسپتال پہنچا کر طبی امداد فراہم کی جائے، جاں بحق ہونے والوں کی میتیں اُن کے علاقوں میں بھیجنے کے اقدامات کیے جائیں۔

انہوں نے کہا کہ اگر ڈاکٹرز کی ضرورت پڑے تو لیاقت میڈیکل یونیورسٹی سے بھیجیں جائیں، امدادی کاموں کے حوالے سے مجھے باخبر رکھا جائے۔

واضح رہے کہ سندھ کے ضلع جامشورو میں انڈس ہائی وے پر تیز رفتار ٹرک اور مسافر وین میں تصادم میں 15 افراد جاں بحق ہوگئے ہیں۔

جامشورو میں انڈس ہائی وے پر تیز رفتار ٹرک اور مسافر وین کے درمیان خوفناک تصادم ہوا جس کے نتیجے میں 15 افراد جاں بحق اور متعدد زخمی ہوئے، زخمیوں کو فوری طور پر قریبی اسپتال منتقل کردیا گیا۔

ریسکیو ذرائع کا کہنا ہے کہ حادثے کی اطلاع ملتے ہی رضاکار اور پولیس کی ٹیمیں جائے حادثہ پر پہنچیں اور امدادی کارروائیاں شروع کی گئیں، حادثے کا شکار ہونے والی مسافر وین دادو سے حیدر آباد جا رہی تھی۔

سندھ پولیس کے مطابق حادثہ انڈس ہائی وے پر مانجھمند کے قریب پیش آیا اور جاں بحق ہونے والے افراد میں 14 کی شناخت ہوگئی ہے ، جاں بحق ہونے والوں میں زیادہ تر مزدور تھے جو مزدوری کے لیے جارہے تھے۔

خیال رہے کہ سندھ کی زیادہ تر سڑکیں ٹوٹ پھوٹ کا شکار ہیں جس کے باعث آئے دن حادثات ہوتے رہتے ہیں اور اس کے علاوہ تیز رفتاری اور گاڑیوں کی بروقت مینٹنس نہ ہونا بھی حادثات کی اہم وجوہات میں شامل ہیں۔

دوسری جانب چیئرمین پیپلز پارٹی بلاول بھٹو زرداری نے جامشورو کے قریب افسوسناک حادثے میں قیمتی جانوں کے ضیاع پر اظہارِ رنج و غم کا اظہار کرتے ہوئے کہا کہ حادثے کی خبر سن کر صدمے میں ہوں ، متعلقہ حکام حادثے کے اسباب معلوم کریں، حادثات کی روک تھام کے لیئے اقدام کریں۔

بلاول بھٹو زرداری کا کہنا تھا کہ حادثے میں اپنے پیاروں کو کھونے والوں کے غم میں برابر کا شریک ہوں ، دعاگو ہوں، اللہ تعالیٰ جاں بحق ہونے والوں پر اپنی رحمت نازل فرمائے اور زخمیوں کو جلد از جلد صحت عطا فرمائے۔