fbpx

کراچی والوں کو بھی خوشخبری سنادی گئی

کراچی :کراچی والوں کو بھی خوشخبری سنادی گئی ،اطلاعات کے مطابق کے الیکٹرک نے حکومت پاکستان کے اعلان کی روشنی میں 200 یونٹ سے کم بجلی استعمال کرنیوالے گھریلو صارفین کیلئے نظرثانی شدہ بل جاری کرنے کا فیصلہ کیا ہے۔

ترجمان کے الیکٹرک کے مطابق وہ تمام نان ٹی او یو (جن کا منظور شدہ لوڈ 5 کلوواٹ سے کم ہو) رہائشی صارفین جن کا استعمال 200 یونٹ سے کم ہے ان کو فیول ایڈجسٹمنٹ چارجز کے حوالے سے ترمیم شدہ بلوں کا اجراء 26 اگست سے کیا جائے گا۔

کے الیکٹرک کا کہنا ہے کہ متعلقہ صارفین اپنے نظر ثانی شدہ بل کے اجراء کیلئے قریبی کسٹمرز کیئر سینٹر سے رابطہ کریں، صارفین کی سہولت کیلئے کے الیکٹرک کے کسٹمر کیئر سینٹرز جمعہ اور ہفتہ رات 8 بجے جبکہ اتوار کو شام 5 بجے تک کھلے رہیں گے۔

کے الیکٹرک نے ماہانہ 200 یونٹ سے کم بجلی استعمال کرنیوالے صارفین کے اگست کے بلوں کی آخری تاریخ میں بھی 30 اگست تک توسیع کردی گئی ہے۔

حکومت پاکستان کے اعلان اور بل کی آخری تاریخ میں اضافے کا اطلاق 200 یونٹ سے زائد استعمال کرنیوالے رہائشی صارفین، ٹائم آف یوز اور کمرشل و انڈسٹریل صارفین پر نہیں ہوگا۔

وزیراعظم شہباز شریف نے دو روز قبل ملک بھر کے ایک کروڑ 70 لاکھ بجلی صارفین کو بلوں میں فیول ایڈجسٹمنٹ چارجز سے استثنیٰ دینے کا اعلان کیا تھا۔