حکومت نے شہریوں کیلئے ایمنسٹی اسکیم کی منظوری دے دی

اسلام آباد:وفاقی حکومت نے ایک سے زائد پاکستانی پاسپورٹ رکھنے والے پاکستانی شہریوں کیلئے ایمنسٹی اسکیم کی منظوری دے دی۔اس حوالے سے اہم فیصلے بھی ہوچکے ہیں‌

وزارت داخلہ کی طرف سے وفاقی کابینہ کو ایمنسٹی اسکیم کیلئےبھیجی جانے والی سمری پر گذشتہ کابینہ اجلاس میں منظوری دی گئی۔ایمنسٹی اسکیم کا اطلاق ان پاکستانی شہریوں پرہوگا جو ایک سے زائد شناخت رکھتے ہیں اور انکے کے پاس ایک سے زائدپاکستانی پاسپورٹس ہیں۔

ترجمان وزارت داخلہ کا کہنا ہے کہ وفاقی حکومت کے فیصلے کے مطابق ایمنیسٹی اسکیم 31 دسمبر 2022 تک نافذ العمل رہے گی۔

یاد رہے پاسپورٹ ایکٹ 1974 کے سیکشن 6 کے تحت ایک سے زائد شناخت پر پاسپورٹ رکھنے والوں کو زیادہ سے زیادہ 3 سال سزا ہوسکتی ہے۔وفاقی حکومت نے ایمنسٹی اسکیم کے ذریعے پاسپورٹ ایکٹ کے سیکشن 12 کے تحت ایک سے زائد پاکستانی پاسپورٹ رکھنے والوں کیلئےایک دفعہ سزا سے معافی کا فیصلہ کیا ہے۔

ایمنسٹی اسکیم کو مفاد عامہ میں منظور کیا گیا ہے جس سے اندرون ملک اور بیرون ممالک مقیم پاکستانی یکساں استفادہ کرسکیں گے۔

اس سے قبل 2006 سے 2016 تک وفاقی حکومت چھ ایمنسٹی اسکیمز جاری کرچکی ہے جن سے تقریباً 12,000 ایک سے زائد شناخت والے پاکستانی پاسپورٹس منسوخ کئےگئے ہیں۔

وزارت داخلہ کے اعداد و شمار کے مطابق حالیہ ایمنسٹی اسکیم سے تقریباً 38 ہزار ایک سے زائد شناخت رکھنے والے پاکستانی پاسپورٹس منسوخ کیے جاسکیں گے۔ایمنسٹی اسکیم کو زیادہ سے زیادہ مؤثر بنانے کیلئے پاکستان اور بیرون ملک مناسب تشہیر کی جائے گی۔