گلگت سے لاہور آنے والی پی آئی اے کی پرواز حادثے سے بال بال بچ گئی

لاہور:گلگت سے لاہور آنے والی پی آئی اے کی پرواز حادثے سے بال بال بچ گئی ،اطلاعات کے مطابق پاکستان انٹرنیشنل ائیرلائنز (پی آئی اے) کی گلگت سے لاہور آنے والی پرواز حادثے سے بال بال بچ گئی۔

ائیرپورٹ ذرائع کے مطابق پی کے 610 کی لینڈنگ سے پہلے پرندوں کا غول اچانک سامنے آگیا تاہم اے ٹی آر جہاز کے کپتان نے مہارت کے ساتھ طیارہ بحفاظت لینڈ کروالیا۔

ائیرپورٹ ذرائع نے بتایا کہ لینڈنگ کے بعد کپتان نے کنٹرول ٹاور کو پرندوں کی موجودگی کی شکایت کی۔ائیرپورٹ ذرائع کے مطابق کپتان کی شکایت کے بعد کنٹرول ٹاور نے رن وے کلیئر کرانے کیلئے برڈ شوٹربھجوا دیے۔

یاد رہےکہ اس سے پہلے مارچ کے مہینے میں پی آئی اے کا طیارہ اُڑان بھرنے کے بعد حادثے سے بال بال بچ گیا، کراچی سے اسلام آباد جانے والی پرواز پی کے 368 کے دائیں انجن سے پرندہ ٹکرا گیا، پائلٹ نے کمال مہارت سے جہاز کو بحفاظت کراچی ائیرپورٹ اتار لیا۔

تفصیلات کے مطابق پی آئی اے کی پرواز پی کے 368 کے دائیں انجن سے پرندہ ٹکرا گیا، جہاز دوبارہ باحفاظت کراچی ائیرپورٹ پر اتار لیا گیا، پرندہ جہاز کے ٹیک آف کے بعد بلند ہوتے ہوئے ٹکرایا۔

ترجمان پی آئی اے کے مطابق پرواز پر 162 مسافر سوار تھے،مسافروں کو لاوئنج میں منتقل کرکے جہاز کے نقصان کا جائزہ لیا جائے گا، مسافروں کو متبادل جہاز یا پرواز کے ذریعے اسلام آباد لے جایا جائے گا۔

ترجمان پی آئی اے کا کہنا ہے کہ ائیرپورٹ کے اطراف آبادی، آلودگی اور پرندوں کے روک تھام کا موثر نظام کا نہ ہونا ایسے واقعات کی سبب بنتا ہے۔ فضائی حفاظت اداروں اور معاشرے دونوں کی ذمہ داری ہے اور ہم سب کو اپنا کردار ادا کرنا ہوگا