تیسرا چیئرمین واپڈا گولف ٹورنامنٹ راولپنڈی گولف کلب کے عمر کھوکھر نے جیت لیا

اسلام آباد:راولپنڈی گولف کلب کے عمر کھوکھر نے تیسرا چیئرمین واپڈا گولف ٹورنامنٹ کا ٹائٹل جیت لیا۔گولف ٹورنامنٹ لاہور جم خانہ گولف کلب میں تین روز تک جاری رہا۔

گورنر پنجاب چودھری محمد سرور اختتامی تقریب کے مہمانِ خصوصی تھے جنہوں نے کامیاب کھلاڑیوں میں انعامات تقسیم کئے۔ اِس موقع پر بوسنیا کے سفیر ثاقب فورق، آسٹریا کے سفیر نیکولس کیلر، جنوبی افریقہ کے ہائی کمشنر Mthuthuzeli Madikiza، چیئرمین واپڈا لیفٹیننٹ جنرل مزمل حسین(ریٹائرڈ) اور گولفرز کی کثیر تعداد بھی موجود تھی۔

تقریب سے خطاب کرتے ہوئے گورنر پنجاب نے کہا کہ دُنیا بھر میں ترقی کے لئے کھیلوں کو بنیادی عنصر سمجھا جاتا ہے۔اِس لئے پاکستان میں کھیلوں کے فروغ کے لئے تمام کوششیں بروئے کار لانی چاہیں۔ اُنہوں نے پاکستان میں کھیلوں کے فروغ کے لئے واپڈا کی خدمات کو سراہا۔

اُنہوں نے کہا کہ پانی اور پن بجلی کے منصوبوں پر کام کرنے کے ساتھ ساتھ واپڈا کارپوریٹ سماجی ذمہ داری کے تحت کھیلوں کے فروغ کے لئے بھی مصروفِ عمل ہے۔اُنہوں نے مزید کہا کہ دیگر سرکاری اداروں کو بھی واپڈا کی تقلید کرنی چاہیے۔اُنہوں نے اِس ٹورنامنٹ کے کامیاب انعقاد پر چیئرمین واپڈا اور اُن کی ٹیم کو خراجِ تحسین پیش کیا۔

واضح رہے کہ تیسرا چیئرمین واپڈا گولف ٹورنامنٹ 12 سے 14فروری کے درمیان لاہور جم خانہ گولف کلب میں کھیلا گیا۔ ٹورنامنٹ میں امیچورز، سینئر امیچورز، لیڈیز، ویٹرنز اور انوی ٹیشنل کیٹیگریز میں مقابلے ہوئے۔

ٹورنامنٹ نتائج کے مطابق ویٹرنز کیٹیگری میں فرسٹ گراس میں لاہور جم خانہ کے جاوید اے خان جبکہ فرسٹ نیٹ میں لاہور جم خانہ ہی کے اسماعیل قریشی نے جیتا۔لیڈیز کیٹیگری میں فرسٹ گراس میں پاکستان ایئر فورس کی سُنیہ اُسامہ جبکہ فرسٹ نیٹ میں واپڈا کی زیب النساء نے کامیابی حاصل کی۔

سینئرز کی کیٹیگری میں فرسٹ گراس میں لاہور گیریژن کے کرنل رستم علی چٹھہ جبکہ فرسٹ نیٹ میں میجر جنرل سجاد رسول کامیاب ہوئے۔انوی ٹیشنل کیٹیگری فرسٹ گراس میں کرنل شوکت عباس جبکہ فرسٹ نیٹ میں لیفٹیننٹ جنرل محمد ہلال حسین نے مقابلہ جیتا۔ ٹورنامنٹ کے امیچورز کیٹیگری میں فرسٹ نیٹ لاہور جم خانہ کے محمد ناصر ارشاد کے نام رہا۔
٭٭٭

جواب چھوڑیں

آپ کا ای میل ایڈریس شائع نہیں کیا جائے گا.