ملک میں آگ لگانے والے ملک کے محسن نہیں ہو سکتے:مریم اورنگزیب

اسلام آباد:وزیر اطلاعات مریم اورنگزیب نے تحریک انصاف کے احتجاج کے دوران میں کارکنان کی جانب سے جلاؤ گھیراؤ اور توڑ پھوڑ کی شدید مذمت کی ہے۔مریم اورنگزیب نے کہا ہے کہ ملک میں آگ لگانے والے محسن نہیں ہوسکتے

مریم اورنگزیب کا کہنا تھا کہ سرکاری املاک پر حملہ کرنے والے ملک کے دوست نہں ہو سکتے۔ فارن فنڈد فتنے کی ذہنیت نے ملک کو تقسیم کر دیا ہے۔ یہ فتنہ الیکشن نہیں خانہ جنگی چاہتا ہے۔

وزیر اطلاعات نے سوال اٹھایا کہ پنجاب حکومت نے ابھی تک وزیر آباد فائرنگ پر ایف آئی آر کیوں نہیں کاٹی۔ عمران خان کسی سرکاری اسپتال سے رپورٹ نہیں لکھوا رہا۔ فارن فنڈڈ فتنہ میڈیکو لیگل کے قانونی ضابطوں کو پورا نہیں کر رہا۔

مریم اورنگزیب کا کہنا تھا کہ فارن فنڈڈ فتنہ الیکشن نہیں خانہ جنگی چاہتا ہے مگر عوام نے انتشار کی اور فساد کی سیاست کو مسترد کر دیا ہے۔

دوسری طرف گورنرہاؤس انتظامیہ نے بے قابو ہجوم کے گورنر ہاؤس پر حملے کيخلاف چیف سیکریٹری پنجاب اور آئی جی پنجاب کو مراسلہ لکھ دیا۔ مراسلے ميں سيکیورٹی بڑھانے اور حملہ آوروں کيخلاف مقدمہ درج کرنے کا کہا گيا ہے۔

پاکستان تحریک انصاف نے عمران خان پر حملے کیخلاف جمعہ کو ملک بھر میں احتجاجی مظاہرے کئے، لاہور میں ہونیوالے احتجاج کے دوران مظاہرین نے گورنر ہاؤس پر دھاوار بول دیا تھا۔

لاہور میں بے قابو ہجوم کے گورنر ہاؤس پر حملے کے بعد انتظامیہ نے چیف سیکریٹری پنجاب اور آئی جی پنجاب کو سیکیورٹی بڑھانے اور ملوث افراد کو گرفتار کرنے کیلئے مراسلہ لکھ دیا۔