سندھ کے سکولوں کی حالت زار:تھرپارکر میں اسکول کی خستہ دیوار گرنے سے 3 بچے جاں بحق

مٹھی:سندھ کے سکولوں کی حالت زارنے پھرہستے بستے گھروں کے چراغوں کی روشنی کوچھین لیا ہے،اطلاعات کےمطابق تھرپارکر میں اسکول کی خستہ دیوار گرنے سے 3بچے جاں بحق ہو گئے۔

ذرائع کےمطابق بھٹو کی نگری میں تھرپارکر کی تحصیل ننگرپار کر کے گاؤں بھورو ساند میں اسکول کی خستہ دیوار گرنے سے 3بچے جاں بحق ہو گئے جن میں 6سالہ امبرین، 6 سالہ مکیمہ اور اس کا بھائی 4سالہ علی رضا شامل ہیں۔ واقعہ اس وقت پیش آیا جس بچے قرآن پاک پڑھ کر واپس آرہے تھے۔

سندھ حکومت کی علم دوستی کا بھانڈہ پھوڑتے ہوئے ورثا کا کہنا ہے کہ کئی بار محکمہ تعلیم کے افسران کو بتایا کہ دیوار خستہ ہے مگر انھوں نے کوئی توجہ نہ دی،ان کی غفلت سے ہمارے بچوں کی زندگیاں چلی گئیں، اعلی حکام سے انصاف کی اپیل کرتے ہیں۔