ڈاکٹرغلام مصطفی بڈانی
سیالکوٹ (باغی ٹی وی بیوروچیف شاہد ریاض) سیالکوٹ پولیس نے انٹرپول کی مدد سے ایک بڑی کامیابی حاصل کرتے ہوئے کمسن بچی کے اغوا میں مطلوب خاتون سمیت دو اشتہاری ملزمان کو بیرون ملک کویت سے گرفتار کر لیا ہے، جبکہ مغویہ 4 سالہ بچی کو بھی بازیاب کروا لیا گیا ہے۔
ترجمان پولیس کے مطابق تھانہ کینٹ میں درج مقدمہ کے تحت 4 سالہ بچی زونیرہ فاطمہ کو سال 2023 میں سیالکوٹ سے اغوا کیا گیا تھا۔ اغوا کے بعد ملزمان بچی کو لے کر بیرون ملک کویت فرار ہو گئے تھے۔
پولیس نے جدید ٹیکنالوجی کو استعمال کرتے ہوئے اور انٹرپول سے رابطہ کر کے اغوا اور جعلسازی کے سنگین مقدمات میں مطلوب خاتون صدف انور سمیت دو ملزمان انوار اقبال کو کویت میں ٹریس کر کے گرفتار کر لیا ہے۔ پولیس نے بروقت کارروائی کرتے ہوئے مغویہ کمسن بچی زونیرہ فاطمہ کو بھی ملزمان کے قبضے سے بحفاظت بازیاب کروا لیا ہے۔
گرفتار ملزمان کو اب پاکستان منتقل کرنے کے لیے قانونی کارروائی جاری ہے۔ پولیس حکام نے اس اہم کامیابی پر اپنی ٹیم اور انٹرپول کے تعاون کو سراہا ہے اور یقین دلایا ہے کہ ملزمان کو جلد قانون کے کٹہرے میں لایا جائے گا۔ بچی کی بازیابی پر اس کے اہل خانہ میں خوشی کی لہر دوڑ گئی ہے اور انہوں نے پولیس کی کاوشوں کو خراج تحسین پیش کیا ہے۔
